莊思明做阿四男友話之你
最近蜜運中的莊思明，日前與德越混血男友拍拖到銅鑼灣買大閘蟹，買完蟹之後，男友即大安旨意吔零食，完全無意欲幫手；而Lisa負責畀錢之餘，更做「阿四」拿戰利品，然後雙雙乘七人車返歸擦蟹。
拿督女兒兼前港姐季軍莊思明（Lisa），自今年四月與陳慧琳胞弟陳司翰分手後，最近成功搭上一名外表斯文靚仔的德越混血新歡，雖然兩人拍拖短短三個多月，已愛得十分癡纏，不時被拍得孖住夜蒲。
最近大閘蟹當造，不少愛擦蟹之人都會買番幾隻返家慢慢歎，日前下午6時許，記者發現穿上jumpsuit配西裝褸的Lisa，與西裝骨骨的混血男友現身銅鑼灣一間大閘蟹專賣店，起初兩人於門外的雪櫃前睇蟹，只見Lisa不時手指指研究一番，期間亦有商有量。未幾男友突然步出到附近買了一包「口立濕」，撇下Lisa自己一個繼續揀蟹，買完零食才折返會合女友。
邊行邊吃
當Lisa取出銀包付款時，男友只站在一旁眼望望，其後店員將數隻打包好的大閘蟹交給Lisa，男友依然企定定袖手旁觀，完全沒有意欲代勞拿蟹，Lisa只好自動波做「阿四」拿戰利品，而男友則尾隨追着女友，邊行邊吃剛買回來的零食，然後步往附近街頭，由司機接載返家撐枱腳。
文、攝：追蹤組