陳偉霆重口味戴Bra遊旺角

William前晚與一眾電影《紮職》演員包括曾國祥、徐偉棟、吳浩康，現身戲院看觀眾反應。詩雅與湯怡對電影票房有信心，William則承諾若有千萬票房，眾男演員會外着T-back遊砵蘭街慶功，如超過千萬元，便加碼戴Bra遊街！

William在讀書時期活躍於球場，更有被人踢入會經歷，他說：「去球場踢波個個都話有背景，我都唔知信邊個好，最終我自己入咗舞蹈學會，去咗跳舞唱歌，唔去踢波。」

吳浩康（左起）、William及徐偉棟現身宣傳。

詩雅（左）和湯怡第一次到旺角睇午夜場。

湯怡反串陪詩雅入場

至於吳浩康則表示自己從未入會，但當時誤以為自己已經入會，他說：「我喺球場踢波，冇人逼我入會，佢哋好友善同我講，加盟做成員有乜好處，好似邀我去行山咁健康，後來我哋做咗好朋友，嗰陣時我仲以為已經入咗會。」

詩雅與湯怡自稱從未去過旺角睇午夜場，揚言會易容入戲院，感受一下觀眾的真反應，詩雅說：「我會戴個假髮入戲院睇午夜場。」湯怡則表示會反串扮男人，做詩雅「拖友」齊齊去睇戲。

此外，William與Twins昨日出席新城頒獎禮活動，問到William有冇叫女友阿Sa（蔡卓妍）睇《紮職》？他說：「冇呀，呢部男人戲，啱同兄弟睇先，而且最近大家都忙。（戲中被打到周身傷，怕阿Sa睇到心痛？）唔係，佢可能冇興趣睇啩。」而阿Sa則表示會自己買飛睇戲，主要是支持港產片。

文：影視組