錢國偉訴苦：佢當我沙包咁打
金牌監製錢國偉（Wilson）曾炮製《獎門人》系列、《美女廚房》及《五覺大戰》等甚受歡迎的節目，入行近30年的他原來出身自兒童節目，曾與一代笑匠周星馳共事半年，他自爆當年星爺已是武癡，更經常將他當沙包打！
1983年我加入無綫，當時搵唔到工，想加入做紀律部隊，但咁肥仔入唔到啦！於是表哥叫我嚟ＴＶＢ做暑期工，冇幾耐轉做兒童組助理編導（PA），做兒童節目好開心，亦係好好嘅訓練地方，有迷你話劇、MV、時事報道，咩都要一腳踢，《黑白殭屍》大結局我仲有份出鏡，做研究員捉星爺o架！其實做PA真係好辛苦，大家要體諒，一唔夠人又要出鏡，當時我都有演過掌櫃、忍者！
整蠱譚玉瑛
同星爺合作過半年，佢當時練緊搏擊，就朝朝當我沙包咁練拳，佢唔係只係打我嘅，不過我係肥仔打大力啲囉！當年我哋有好多搞笑事，例如等譚玉瑛返工，但佢好Cool好似大家姐咁，我、星爺、龍炳基就追住佢扮打佢，當然係打唔到啦！諗番起都覺得低能。好多人話星爺難相處，可能藝術家係孤僻啲，好多嘢諗。我一早已經覺得佢會紅，因為佢天生就係咁無厘頭，好多鬼主意！
冇追黎芷珊
至於黎芷珊呢排好紅啦！當時一齊主持兒童節目嘅佢已經係殺手，好多男仔追，咁佢的確係個好Cute嘅少女，成日有人等佢，呢排佢喺節目講番嗰啲我都見過晒（註：梁家輝、鄭伊健、陳小春），其實仲唔止o架！我就冇追過佢，仲成日笑佢。有一排佢曬到好黑，我就笑佢似皇母娘娘，專保佑水上人！
口述：錢國偉
筆錄：影視組