琦琦Lisa S.誓做internet mogul
任達華太太琦琦與吳彥祖太太Lisa S.，兩位名模同樣擁有幸福家庭、同樣有靚仔又有型的明星老公，兩人性格又相近，同是爽朗及不拘小節。在互相欣賞下，兩人一拍即合齊齊搞網上生意，雖然生活無憂，完全可以老公養，但她倆為免與時代脫節，誓要做個女強人，將生意托展至全球，做internet mogul（網絡大亨）。
Lisa S.已漸漸退出模界，除了主力向主持方面發展外，她開設的網上美容購物亦搞得有聲有色，近期又有新諗頭，開設飾物網站Glamagem，還邀請了琦琦加入，兩人齊齊拍檔進軍網上生意，除了亞洲巿場外，還希望將來可開拓歐美巿場，做網絡大亨。
琦琦：我哋以前好多時都會一齊做騷，識咗Lisa都有一段日子，一直覺得佢好有生意頭腦、好聰明，而且大家性格都好直接，當初佢問我有冇興趣搞網上生意時，我就一口答應。其實咁多年，有唔少人搵我做生意，但唔係覺得時機唔啱，就覺得啲嘢唔啱我，所以冇做，今次我好buy佢嘅諗頭，覺得網上購物係大勢所趨，而且我哋做騷咁多年，見過唔少靚嘢，今次我哋會親自設計飾物，可以將自己擅長及潮流嘅嘢介紹畀大家。
品味風格一致
Lisa：我當初搵琦琦做拍檔時都好戰戰兢兢，只係膽粗粗問吓佢，點知佢真係應承，我簡直唔敢相信，真係開心到飛起。之後傾落覺得同琦琦真係好夾，我哋無論眼光、品味及風格都好一致，而且大家都鍾意靚嘢，好想同大家分享。
琦琦：我哋兩人每個月都會設計一款飾物，設計靈感好多時來自旅行、平時接觸嘅事物，留意潮流動向，我依家都設計咗六款。我哋每次開會都會交流心得，大都互相鼓勵，中西合璧都幾有趣。
由亞洲到歐美
Lisa：大家會提點對方嘅設計，呢方面我哋眼光好唔同，會好直接同對方講鍾意或唔鍾意，有乜地方要改進，但從來唔會因為咁樣爭吵。我哋對今次合作充滿信心，依家主要向亞洲進發，中國巿場實在太大，我哋只係成立咗三個月，人數增加得好crazy，希望將來開拓歐美巿場，做internet mogul（網絡大亨）。
琦琦：做模特兒係人生其中一個階段，模特兒工作都會一路做，而家庭亦好重要，但亦想做自己鍾意做嘅嘢，我覺得女仔一定要有自己嘅事業，唔係為錢，係為增值自己。
Lisa：我唔可以做「太太」，要我每日只扮靚、行街，無所事事，我一定做唔到，雖然自己成日都好忙，但忙完工作會好開心。
同獲老公支持
琦琦：人生好快過，要做啲有意義嘅嘢，要做個時代女性，要有自己思想、目標、事業，勤力嘅人都會變得靚啲、有自信啲，老公都好支持我擁有自己嘅事業。
Lisa：我老公都好支持我，不過就算佢唔支持我，我都會照做，我要強過身邊嘅男人，啲人以為老公係明星，好有錢，金錢上會支持我，但我同老公喺金錢上係完全獨立，我哋數目好分明，我自己賺到足夠我自己用，我又唔係大使嘅人，老公覺得佢嘅錢係留番畀小朋友。
琦琦：咁我同你唔同，雖然大家都有自己嘅銀行戶口，但老公好似驚我冇錢使咁，不時會自動畀錢我，我做乜佢都會無限量支持。
採訪：Jessica Lam
攝影：司徒國榮
場地：FACES Music Lounge（灣仔海景萬麗酒店）