黎燕珊認叻籌百萬 羅霖寸邀功
羅霖與黎燕珊兩位前亞姐兼仁美清叙主席、會長早前隔空過招，前者有感受屈哭訴人前，昨日二人自事件後首度碰面，黎燕珊自誇為慈善晚會籌得百萬善款，羅霖卻暗寸有人誤解憑個人努力可經營仁美，說話明顯有骨。及後傳媒要求兩位阿姐合照，黎燕珊聞言即黑面兼掉頭走，後來才態度軟化折返，主動搭羅霖膊頭及握手，並表示：「家和萬事興！」而顧問葉家寶則全程當和事老。
羅霖於本月初宣布與丈夫劉坤銘分居數個月，期間傳出羅霖搭上年輕男子，及後黎燕珊揶揄羅霖有損亞姐形象，兩女因此傳出不和，不甘被抹黑的羅霖，隨即接受本報專訪哭訴澄清。而自事件發生後，羅霖與黎燕珊昨日於觀塘apm舉行的《仁美愛心滿亞洲》慈善晚宴記者會上首度碰頭，不過二人被安排坐於林建名與蘇永康兩旁，全程未有任何交流。
期間羅霖與黎淑賢分別於台上致詞，顧問葉家寶亦趁發言時充當和事老，他謂：「最近聽到啲關於羅霖同黎燕珊唔開心事發生，佢哋兩個都係亞洲小姐，有善心為件事，我有信心大家會衝破紛爭是非！」於活動結束後，傳媒要求兩女合照，惟二人中間夾着葉家寶，未幾黎燕珊還一度黑面轉身準備落台，當傳媒再三要求，黎燕珊才態度軟化折返，還主動輕搭羅霖膊頭、握手謂：「家和萬事興！」羅霖聞言亦以笑回應。
擺和頭酒珊姐冇時間
對於不和事件後首度碰面，羅霖坦言不用心理準備，問到會否辭任主席一職避是非？她謂：「睇情況，個會運作都上軌道，只不過近半年透明度唔高，（有會員話啲數好亂！）冇亂，因為有會計師，（宮雪花話你同黎燕珊踢佢出會最齊心！）我哋有7個理事，有重大決定都要舉手贊成通過。」不諱言雙方未有就事件聯絡過，反而葉家寶有來電，她說：「家寶早幾日打畀我問有冇時間，但佢話珊姐冇時間，其實唔係咩和頭酒，只不過將唔同聲音講出嚟，（今日見面尷尬？）唔會，我問心無愧，對事唔對人！我想話仁美唔係一個人努力，係所有會員同心協力做，有啲人誤解咗，以為一個人可以做囉！」羅霖更指近排受壓力激瘦10磅，體重跌破100磅新低。
忘記仔生日內疚落淚
至於黎燕珊被問到為何二人零交流，她解釋雙方均專注台上的流程，更透露近日為籌款晚宴奔波：「我一個人籌到100萬，唔係覺得自己好威，只不過係作為會長嘅責任，其實有咩風風雨雨，大家一齊面對啦！為呢啲事咁樣唔值得。（羅霖話你唔得閒見面？）因為呢排好多嘢做，又要收支票，又要分枱，不過我覺得係有需要坐低傾嘅。」黎燕珊更指因忙得不可開交，就連兒子日前14歲生日也忘記，令其大感內疚，說罷更忍不住流淚。談到要求合照時一度黑面，黎燕珊否認，表示只是聽不到而已。
文：影視組