英國萬人迷球星碧咸（David Beckham）的女兒夏柏舒芬（Harper Seven）一向cute爆娛樂界。她日前便被狗仔隊影到學老竇在草地上「放飛劍」，自行散步的她多次論盡跌倒，但她不覺痛亦沒有喊，自行起身繼續散步。
已15個月大、經常以一身貴氣打扮的舒芬妹妹，每次出場都有父親碧咸或母親Victoria在旁，讓人感受到她的金笸籮地位。不過，舒芬妹日前被狗仔隊影到，在碧咸與Victoria都冇影下，由疑似保母陪同下帶到紐約中央公園動物園睇動物。
剛學識行無耐的舒芬妹被影到在沒有其他人傍實之下，一個人在草地周圍行，更不時被影到行得好論盡仆倒幾次，不過唔知是否舒芬「肉厚」的關係不覺疼痛，亦沒有大哭扭計，跌倒之後即自己企起身繼續散步。期間可能學老竇踢波時「放飛劍」，自己亦有樣學樣被指在草地上吐口水，認真好學唔學！
雖然舒芬「隨地吐口水」，但以「可愛至上」為原則的網友不但沒有提放飛劍一事，更大讚她既美麗又可愛。不過亦有網友留言批評Victoria成日將囡囡打扮得好像去喪禮般，更提議貴為時裝設計師的她應畀女兒穿有多點顏色的衣服而非素色服。
文：外娛組