謝婷婷型fit靚正

謝婷婷

冇得彈，perfect，好靚，sexy得嚟又有型，加上佢身材fit爆，比例好靚，成個look好正，對手套有畫龍點睛嘅作用，如果冇對手套感覺會好dry，加咗對手套成個效果唔同晒。

胡杏兒

幾驚嚇，個髮型好似雀巢，嘥咗佢個靚樣同埋fit爆嘅身材。白色Tight pants易顯得肥，佢着咗依然好slim，可惜件外套同鞋好肉酸，唔要外套，換對高踭鞋會靚好多。

胡杏兒	佘詩曼	鄭融

佘詩曼

娘娘哋，雖然紅襯黑永遠都咁hit，但佢件衫出事，下身OK，件衫過長令對腳望落短咗，如果件衫短到去腰位，或者將件衫攝番入去，拉番長腳嘅線條會好睇好多。

容祖兒	鍾欣桐	李冰冰

鄭融

好得人驚，條Tight pants顯得佢更肥！原本一身嘅配搭OK，不過條Tight pants係令面就出事喇，會着到人顯得肥咗，唔好揀令面會好好多。

容祖兒

好有型，桃紅襯黑色好正、好sharp，件衫露腰嘅設計有少少性感，髮型同化妝又靚又match，成個look個舞台效果好好，凸顯咗佢既fit且高挑嘅身材。

鍾欣桐

條Tight pants本身好靚，上半身冇問題，髮型化妝都靚，可惜佢襯對boots令到身形比例短咗又肥咗，嘥咗，如果換對勁高嘅七彩閃片高踭鞋會靚好多，可以拉番長個線條。

紅地氈撞衫 李冰冰slim贏

內地女星李冰冰與澳洲女星Bella Heathcote不約而同穿上同款晚裝裙行紅地氈，Eunis認為冰冰的演繹更勝一籌：「李冰冰着得靚好多，有氣質，膊頭冇咁多肉，顯得slim啲修長啲，望落好高挑，耳環、手袋都好靚，好襯個look。Bella Heathcote着呢條裙就顯得比較橫，大隻咗啲，個手袋亦唔靚。

陳嘉容Profile

陳嘉容（Eunis），香港著名模特兒，曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不到她，近年更為電視時裝節目擔任主持，化身stylist教人配襯衣着打扮。