陳嘉桓遭Tall累 冇仔敢埋身

經歷多外表早熟

19歲一年發生好多事，無論工作定係其他都有好大轉變，當然有開心同不開心。回憶呢一年真係過得好快，轉眼間踏入二字頭，我應該要變得更成熟。之前喺內地發生嘅不快事我唔想再提，始終已經過去，自己亦選擇忘記，腦係用嚟記住開心事嘛！而且經一事長一智，最重要係依家會時刻提醒唔好去做錯嘅事。隨住年紀增長進入另一階段，女人味再多啲，哈哈。其實我自覺女人味一般，真係成熟先會有女人味，成日有事發生，先會發覺自己個諗法未必成熟。每次被人呃就好嬲，情緒好激動。

20歲係我新一頁開始。有人話細個想快啲大個，但20歲你就知，會大得好快，30歲可能係轉眼間嘅事，不過對我嚟講，呢啲都係數字遊戲，唔會覺得有咩尷尬，可能好多女仔唔敢同人講幾多歲，但我覺得OK。加上年尾生日，與同年紀嘅人相比，都仲可以扮細個。因為我好細個已經入行，同工作上接觸嘅身邊人相比，自己仍然好細個，不過依家睇到有好多人15、6歲就出嚟做嘢，令我呢個想法唔同，因為我比佢哋心境更加成熟。不過好多人都話我年齡同樣貌差好遠，我樣貌係好早熟，哈哈，似中女嘛！但我唔驚個樣愈嚟愈老，因為人係會變老。

陳嘉桓經常被邀行騷，青春無敵的她不介意性感示人。	成名後的陳嘉桓心態與一般少女無異，都希望有一大班朋友陪她過生日。	外表清純的陳嘉恒緋聞不多，最令人深刻是與林峯傳拍拖。

似公仔頭大腰瘦

有人話女仔高行騷比較好，但有時都係一種煩惱。之前試過拍戲，因為同一位男明星有對手戲，佢要襯番我高度，特登着咗兩吋踭鞋。有人都話我一路瘦但咁高，真人睇比例冇咁靚。但好彩影相係上鏡，我有時都覺得自己似Barbie公仔身形，個頭大腰瘦，但工作又要着高踭鞋，有晒個公仔嘅特質。正因為生得高，工作以外我都唔會着高踭鞋出街，實在好礙眼。而且我好怕搭巴士，唔係因為要同人逼，而係我幾乎由座位起身就撞到個頭，所以要彎低身，但腳又辛苦，諗起都覺麻煩！但高度係父母畀我，所以冇怨過。

仲後生唔急拍拖

好多人都關心我感情生活，fans成日都有問我。依家我仲係單身，未有一個對象。感情事其實好難講，要遇到先得，朋友介紹都要睇吓有冇機會，好多嘢都係講緣分。自己唔心急，覺得仲後生，應該搏殺事業先。雖然冇情人，但唔覺得dry，生活中仲有屋企人同朋友，哈哈！媽咪做情人都唔錯呀！不過緣分要嚟我唔會抗拒，但都係嗰句，真係好難搵！而且自己呢一年繼續高，差唔多高咗一吋，擇偶一定有少少影響。瘦過我可以接受，但如果矮過我一吋就接受唔到。可能幾日後遇到一個矮過我嘅男仔我好鍾意，但呢個可能性都應該好低。我估男仔都唔會搵高過自己嘅女朋友，好似最近一個同學聚會中，一位舊男同學同我講，話以前讀書曾經鍾意我，但因為我太高所以冇考慮。

想突破多線發展

工作上，自己想有突破。入行兩年幾，我主要拍戲或者做模特兒行騷。今年想嘗試做主持，做真正的主持。一方面可以鍛煉口才，而且又可以見識更加多，如果有一個屬於自己的節目梗係好啦！可能你會話我傻，或者呢行有好多厲害主持人，但有呢個機會我唔會放過，不過依家離呢個目標仲係好遠路。我唔會放棄拍電影，希望遇到更加多唔同角色，可能之前都係演打女，其實我唔想定型，有其他角色都會試。當然作為演員想有自己嘅代表作，但我始終入行日子尚淺，我會繼續努力等呢個機會出現。問我形象會唔會轉變？依家可以答你應該未係時候，例如要我剪短髮，自己未必接受到，成日都有諗過呢個問題，但未衝破心理關口。如果真係要做啲好型或扮男仔，都係慢慢嚟啦，等公司決定。但我覺得長髮少女look最適合我。

後記：恨搞生日會 想被掟蛋糕

11月8日生的Rose，被問有何生日願望時，對一般女孩來說，例牌都是身體健康、找個理想伴侶之類，但Rose卻與別不同。她說︰「我想搞一個生日會，有好多年冇搞到。因為自己少出去玩，想開心玩一晚，我想享受畀人掟蛋糕嘅樂趣。」也許你聽後感到愕然，但Rose想要的就是這麼簡單。各位粉絲識做啦！

口述︰陳嘉桓

筆錄︰藍裕彤

攝︰黃叔榮

場地：VEGAS 360