城城自封全能 向前看

郭富城昨日為其代言的Longines180周年展覽會主持開幕禮，於本月26日生日的城城，大會預先為他慶祝，特別送上限量腕錶作為禮物。對於獲「亞洲最傑出藝人獎」，城城表示除他與吳君如外，還有章子怡，可惜子怡趕回港拍戲，兩人未能在紐約碰面。他說：「呢個獎對我嚟講，唔單止係演員，仲係歌手，係全能演員嘅獎項，雖然我仲未拍過舞台劇，但係係我演藝崗位上嘅一個肯定，唔係因一部、兩部電影嘅榮譽，係我入行22年，未計做舞蹈員，應該入行25年，努力嘅個人成績。」

不斷作自我挑戰

城城又謂最開心是他的偶像Alan Alda頒獎給他，城城說：「Alan係六屆艾美獎得獎者，我比起佢係小巫見大巫，佢80幾歲都沒有退休，我當時諗如果我80幾歲會唔會有佢嘅成就。（視佢為目標？）唔係目標，係一個學習，要努力，佢同我講做人要move forward（向前看），亦係我一向嘅宗旨，只要向前看，就唔會原地踏步，所以我點解不斷挑戰自己，今次呢個獎係一個好珍惜嘅生日禮物。」

再過四日就是城城47歲生日，他笑言每年生日應是大一歲，但他卻會將生日減一歲，他說：「最重要係想提醒自己要keep fit啲。」被問到有否約定女友熊黛林（Lynn）一齊慶祝，他說：「私人嘢唔答，每次都問感情嘅事，我今年嘅生日願望係唔想講私人感情事。（你得獎Lynn有冇同你慶祝？）都話私人嘢唔答。」城城透露正日生日已有工作在身，而本周日他的愛駒會出賽，他說：「嗰日都要工作，未知抽唔抽到時間去。」

美粉絲陪切蛋糕

此外，早前城城出席紐約的電影節活動時，特別抽空到美國時代廣場AMC戲院，了解當地觀眾對《三岔口》的反應，原本打算給當地觀眾驚喜的他，反被觀眾送上大驚喜，就是生日祝賀，他在戲院切上今年第一個生日蛋糕，觀眾更一同唱生日歌，令城城大為感動！

文：名人組