阿Sa過累患失語症
蔡卓妍（阿Sa）昨日為英皇電影《超級經理人》拍攝一場遭吳浩康（Deep）強行抬走戲份，阿Deep笑言感覺猶如抱起一疊紙，食極唔肥的阿Sa自爆日前開工疲累過度，一度患上失語症。
阿Sa、杜汶澤及吳浩康（Deep）昨日到大角咀為英皇電影《超級經理人》拍攝外景，劇情講述阿Sa遭阿Deep強行抬走，對於被阿Deep笑言體重輕如一疊紙，阿Sa說：「我都有100磅o架！我都想肥啲，我已經食好多嘢，但都肥唔到，之前試過103磅，重咗3磅，我好開心！」
阿澤無暇揀戰衣
阿Sa自言相當食得，她說：「就算再忙，飛嚟飛去都唔影響我胃口，不過我之前真係試過攰到唔識講對白，嗰日係臨收工一個shot，頭兩次我都背熟晒對白，拍到第三take，我眼望出去，周圍啲嘢變到好慢好慢，對白係記得，不過組織唔番，個人好慶，收工後去咗揼骨，唔知係咪啲火出晒嚟，第二日精神番！」
獲金馬獎最佳男主角提名的阿澤，則忙到未有時間安排金馬獎戰衣，他說：「稍後要去韓國、杭州開工，冇時間搞戰衣。」問他何不叫太太田蕊妮代勞？阿澤笑言老婆比他更忙：「佢仲忙過我，開緊無綫劇，唔只唔得閒幫我搞衫，應該攞唔到假去金馬獎添！以前會恨攞獎，依家拍咗套幫老闆賺錢，自己又開心嘅戲，已經任務完成，冇時間揀戰衣，咪着舊衫，仲環保啦！」
Deep撐舊愛多料爆
阿Deep雖未有留意舊愛莊思敏有份主持的無綫節目《爆足一周》，但對於外界狠批節目冇料到，他說：「畀啲時間，個節目會慢慢tune好，佢（莊思敏）係娛樂圈字典，大把料爆。（爆同你拍拖秘聞都得？）我都冇唔見得光嘅嘢，佢鍾意啦，如果幫到收視，我都唔介意o架！」
文：影視組