周家蔚大肚寫真賣Bra省招牌
梁靖琪（Toby）和周家蔚分屬老友，二人更合作生產內衣品牌，齊齊做設計師及model以身試Bra，展現兩人同樣得天獨厚的身段。至今已有了七個月身孕的家蔚，更打算穿着自己設計的內衣拍大肚寫真，留為紀念之餘又可做生招牌，Toby除給予設計上意見外，更打算與家蔚再搞其他生意，兩個好姊妹希望有自己事業，儲多個「私己錢」。
「BB」出世爬天明頭
梁：我同家蔚嘅內衣品牌終於出咗啦，好興奮！個感覺就好似我同家蔚個「BB」出咗世咁！我要同洪天明講，我爬咗佢頭！哈哈……
周：我哋品牌個形象用色一黑一白，好特別，我好鍾意，可能自己鍾意，事半功倍，呢批內衣我只係準備咗兩個月，製作過程都係四、五個月！真係要計，由設計開始到推出都係半年左右！我哋個內衣品牌主打質地舒服，後面除有拉鏈款式，仲有束帶，好似維多利亞時代款式，可以有好多用途，並非只着出嚟表現性感一面畀老公睇，仲可以當衫咁着出嚟！遲啲我仲會着住自己設計嘅內衣影大肚寫真！不過，我肥咗好多，好豬！
梁：香港人成日以為瘦就係靚，大肚婆肥係應該，依家我哋設計埋孕婦內衣，着起嚟都可以好性感o架！
互相信任冇拗撬
周：我哋識咗四、五年，好多人話好朋友唔好一齊做生意，會傷感情，最後連朋友都冇埋！但我哋從來冇拗撬，反而我係跟Toby學嘢！
梁：我哋太好朋友，佢又好信任我，生意上嘅計劃，家蔚交晒畀我揸主意，都冇乜機會拗撬，反而佢同天明有時鬧交，我幫手勸交就有，我會叫佢哋冷靜吓！依家大家都結咗婚，仲會交流吓夫妻相處之道，你咪睇家蔚外表好似好柔弱，好順得人，佢都好男人性格，好識保護人，我外表好似好強，其實佢保護我o架！
周：係o架！我老公都係咁畀我呃番嚟！我都會忟我老公，發我老公脾氣，咁佢係我最親嘅人嘛！
計劃做埋化妝品牌
梁：我知家蔚好多夢想，除咗做內衣，仲想做化妝，女人唔止留喺屋企做老婆，有啲嘢搞會覺得自己有成功感，因為女藝人唔係個個都咁好彩，女人真係要有積蓄！
周：我選港姐其中一個原因就係想搞化妝，以前我住加拿大，個圈子好細，返到嚟香港先有機會大開眼界，選港姐有得扮靚，就可以接觸到化妝品啦，不過，依家都係計劃階段，先搞好內衣品牌先！
梁：係呀……我本身搞緊Wedding Planner，慢慢將有關嘅服務滲入，做到「一條龍」服務就最好，嚟緊我仲會開化妝學校，可以畀我嘅好姊妹都試吓佢哋鍾意嘅項目生意，等佢哋enjoy吓！
說話到point
周：我好欣賞Toby嘅表達能力，我同佢合作就當學嘢，好似佢嘅談吐，就有好大說服力，好到point，佢同我講解生意上嘅細節，基本上我係唔使發問，佢已經答晒我想知嘅嘢啦，我媽咪都讚Toby o架！
梁：我做定功課先去見客，不過，我都好羨慕你就快做媽咪，雖然我都會生B，但我趁自己仲未過三十歲，希望公司可以再做好啲，上咗軌道，自己先可以用一個最relax嘅心情去生仔，之後我會全心全意湊仔。
周家蔚：周
梁靖琪：梁
文：影視組
攝：司徒國榮
場地：Grand Central