亞生騎呢獻醜亞姐拋胸拉客
亞洲電視前晚舉行《ATV2013節目巡禮》公布來年節目，本以為有新搞作來挽救低迷收視，可惜大多節目都以「炒冷飯」為主，繼續冇劇開。現場賓客少，只靠一班亞洲小姐拋胸吸客，而應屆亞洲先生參賽者的騎呢表演則成為當晚唯一亮點。
一向收視低迷的亞視前晚舉行節目巡禮，可惜來年都以資訊節目為主，例如《高志森微博2》、《亞視百人Ⅱ》、《香港有飯開Ⅱ》等，自家炮製的劇集繼續欠奉。亞視高級副總裁葉家寶否認零製作 :「嚟緊有好多大型晚會，包括國際性財經頒獎典禮，亞洲星光大道都會國際化。（冇劇開？）依家同內地傾緊翻拍經典劇。」期間他又再強調亞視是良心電視台，令大家抓頭。
羅駿宇黐脷筋
節目巡禮現場大約只有250名廣告客戶到場，相比無綫節目巡禮每年都過千的客戶，可謂十分冷清。節目中較有睇頭的可算應屆亞洲先生參賽者的自我介紹，I柯俊威在台上大擺甫士，可惜有型欠奉，反而又娘又騎呢。而身為港男羅天宇弟弟的W羅駿宇雖然外形高大，可惜一開口就嚇親人，說話時黐脷筋口齒不清， 跳hip hop舞時更如猩猩上身，極之爆笑。另邊廂，一班亞姐則以性感低胸裝撐場，以顏子菲及筱靖的拋胸裝最誇張。最後主持人之一許瑩亦臨時拉伕在台上與森巴舞女郎跳舞。
林睿口窒回應
另外，同場的前亞洲先生林睿否認與羅霖的緋聞，他強調二人只是好朋友。問可知羅霖有新歡？他口窒窒地回應不了解事件。而羅霖好友黎燕珊則一見記者便說不想講太多別人的事，又指9月時曾與羅霖夫婦到內地，不覺兩人有異樣。
文：影視組