Cara G. 3.30泰國出嫁
模特兒Cara G.、藝人楊采妮及岑麗香等前晚出席護膚品活動，早前宣布結婚的Cara表示已落實明年3月30日舉行婚禮，她說：「已經訂咗酒店，我會自己設計婚紗，畫咗草稿喇！」而婚禮會假泰國華欣舉行：「係個小型婚禮，唔會請多過100名賓客，冇請模特兒朋友出席。（潛水行禮？）唔會，因為當地唔出名潛水，反而會行山。」楊采妮日前上載一張穿着泳衣與海豚接吻的照片，被指性感時？她沒好氣說：「我唔覺得性感，個重點唔係泳衣，而係海豚。」
至於「宅男女神」岑麗香前晚以低胸示人，十分搶鏡。昨日她出席另一活動時，被問到有傳她是無綫今年內定的飛躍女藝人，她表現愕然：「我唔知喎！我唔預計有，我仲好新，飛躍係代表進步好多，但我覺得自己仲有進步空間，我未夠level。不過有人咁講都好開心。」她稱自己睇好苟芸慧奪此獎項。
