陳偉霆斬人窮兇極chok
藝人曾國祥、陳偉霆（William）、林利等，為英皇電影《紮職》在油麻地街頭上演蠱惑仔追殺江湖大佬場面。一身蠱惑仔造型的曾國祥和陳偉霆入型入格，眼神、動作都十足真蠱惑仔一樣。
鬧市喪跑
在連場激鬥中，被打至頭破血流的曾國祥，為閃避被人追斬而在鬧市喪跑。由於曾國祥血流披面的造型太逼真，彷如萬聖節群鬼出巡，嚇得途人一度嘩然，更有人拿起電話欲報警求助。
曾國祥拍完這幕後搞笑謂：「我未試過一口氣跑咁遠，停機之後我覺得我個肺就嚟爆！（你嚇親人？）我都知自己成面血好嚇人，我已經盡全力狂奔，希望可以一take過拍完，唔想搞到人發噩夢！」
心跳加速
曾國祥就搞到血流披面，但同場的William就保持靚仔，在追斬林利的場面中表情依舊chok爆，事後William表示自己從未試過咁狼死：「成個腦都諗住隊死林利，cut機之後我都心跳加速咗一陣！」
文：影視組