孫佳君：我唔需要圓滿家庭

好多人都知我唔單只係兩個小朋友嘅母親，仲係單親母親，我冇後悔過當年選擇暫停演藝工作，去放咗一個長假，因為我覺得當時我想要set up一個family，女仔如果要組織家庭，唔可以遲，事實上我依家有兩個好可愛嘅小朋友，冇嘢值得後悔。

有人話我之前明明講過「以後唔拍戲」，依家出爾反爾。我冇講過唔拍戲，我點會咁講？我咁鍾意拍戲，咁講咪連客串一兩套嘅機會都抹殺埋？我一定唔會咁講！

孫佳君不介意像從前一樣性感演出。

喜愛做戲的孫佳君在戲中會組織幸福家庭，現實中已不再強求。

照舊性感冇問題

我重返影壇，我兩個仔冇唔習慣、冇唔捨得媽咪，佢哋係男仔，得嘅！雖然已婚仲有兩個細路喺呢行，係冇後生女咁有優勢，但我唔介意同人講我有兩個仔，因為我要有real life，而且做演員唔係只得個樣，要有生活。即使做咗媽咪，要我性感都冇問題，基本上咩演出我都得。

至於感情，有就有，冇就冇，我唔需要再組織乜嘢圓滿家庭，我已經有個家庭，我兩個小朋友都情願有一個開心媽媽，好過有一對唔開心嘅父母。

基於我考慮到我啲小朋友，我唔會答關於我當年同同居男友之間唔開心啲嘢，我信基督教，就係教識我要原諒人，因為你唔原諒人，受苦嘅係你自己，原諒係一種解放，否則你只會永遠鎖住你自己，出唔番嚟。

口述：孫佳君

筆錄：影視組

攝：吳文聰

場地：Il Caffe

化妝：Natalie Soo（D-mop beauty by ND & Co.）