孫佳君秘祭羅兆輝：最大嘅感傷

對於羅兆輝先生逝世，我感到好可惜，最大嘅感傷係，佢作為一個咁聰明嘅人，咁後生就離開人世，令人更加覺得可惜。好多記者傳媒好想我講多啲關於羅生嘅嘢，但係既然佢已經過咗身，我唔想再講咁多。

讚身材好

我只可以話，佢當年離世時，我有出席過喺香港搞嘅儀式，嗰段期間我亦都有為佢祈禱，其餘嘅嘢我真係唔想再講。

有記者問我，羅生曾經向記者讚過我身材好，問我對呢啲讚美有咩感覺？我會答：讚我好，總好過話我唔好呀！至於我點睇羅生評價過我智商唔高，我覺得好多時智商唔高，未必唔係好事！總之關於羅生嘅嘢，我要講嘅已經講晒，唔會再講。

信主開竅

近年我慢慢開始發覺，其實好多時開心同唔開心，係由自己心態去決定，呢種思想我係喺生完兩個小朋友先學識，我覺得做人就應該咁樣去面對人生。

點解我人生會突然開竅？我諗主要係因為我識咗個好好嘅牧師，佢教導我祈禱，我覺得好work，有宗教信仰嘅人，從來唔會只得自己一個去面對問題，因為主會喺上天觀察住，信主嘅人並不孤單。

口述：孫佳君

筆錄：影視組