杜德偉拖女友啜住睇場
歌手杜德偉（Alex）將於下月迎娶26歲女友Ice，一對準新人為保神秘誓不公開婚禮場地，其實原來兩人已揀定在深灣遊艇會舉行婚禮，日前兩人視察場地，男方為氹女友更即興彈琴，冧得女友一臉陶醉主動箍住男友「Kiss」。
杜德偉（Alex）隨着舊愛名模周汶錡下嫁法籍丈夫Julien Lepeu後，即有着落公布「四條一」迎娶拍拖兩年多的圈外女友Ice，但誓不肯透露婚禮場地，將於11月11日與霍啟剛同日做「老襯」的Alex，日前駕駛自家服裝品牌自訂車牌座駕接載老婆現身深灣遊艇會，兩人在多名職員陪同下睇場地布置及商討細節。
CD造型請帖
Alex全程由「老婆」發辦，只是對方揸唔定主意時才「出手」，期間兩人表現恩愛，Alex情深望實「老婆」，氹得對方笑騎騎，情到濃時更「攬埋一舊」，當職員遞上配合Alex歌手身份的CD造型請帖時，兩人大表啱心水，之後眾人拉隊到戶外睇泳池，未知是否有意搞泳池派對。而細心的Alex為免「老婆」做「炭頭新娘」，十指緊扣拖對方到遮陰地方避猛烈陽光。
女友陶醉和唱
視察所有環境後，準備鬆人的Alex見附近有座鋼琴，即發揮多才多藝本色露兩手琴技冧「老婆」，Ice陶醉得在旁和唱，識做的職員為免做「電燈膽」醒目彈開，離開時兩人情不自禁邊行邊「咀嘴」，恩愛程度爆晒燈。
文：音樂組