孫佳君三遭潑酒：多謝周星馳!
新加坡小姐出身的孫佳君，當過周星馳緋聞女友、身家20億富豪的紅顏知己，前半生瑰麗璀璨。2003年起淡出影壇，成為出入名畫拍賣會、古典音樂會等高尚場合常客。2009年因被同居男友毒打而對簿公堂，揭開她已身為兩子之母的底牌。今年9月，孫佳君宣布加盟英皇電影藝人管理部，全面復出拍戲。這位熱愛家庭的單親媽媽，將一連5日講述被周星馳及王家衛玩謝的往事、對羅兆輝的回憶及當年引退組織家庭等無怨無悔的前半生。
《百變星君》係我呢生人第一套電影，嗰時乜都唔識。後來我每次睇番，都覺得如果畀我有機會再嚟過，我一定唔會化個咁濃嘅妝！唔係周星馳為咗搞笑要叫我咁化，係我細個唔識化妝，周星馳雖然唔會提你要注意啲乜，但我好多謝佢嗰時搵酒潑我，幫咗我好大忙。
有場戲講我要畀周星馳攞杯酒潑落塊面，我拍咗兩個take，佢話：「你個表情快咗，好似預咗被人潑咁，唔啱個戲，嗱！陣間我講完句對白，你心入面數三聲，我至潑你啦。」結果數完一，佢就潑咗落嚟，我完全冇預佢會咁囉！不過我一啲都唔難受，反正早啲潑、遲啲潑，我都係要被佢潑o架啦，呢場戲佢仲幫咗我好多添，我要多謝佢。
論梁家輝：強勁嘅對手
因為呢套戲，我同周星馳傳緋聞，講真，我同佢真係好耐冇聯絡，呢次我返出嚟再拍戲，冇搵過佢，但如果你問我想唔想再合作？當然想！亦都唔會驚同佢再傳緋聞，因為我諗傳過一次，應該唔會再傳啩？
況且我覺得自己依家已經唔同，以前我未開竅，真係唔知拍戲係咩一回事，直到電影《黑金》同梁家輝合作，佢的確係好強嘅對手，佢教我就算未埋位都要留意燈光，咁可以幫到自己走位。因為佢太專業、戲又好，搞到我都唔敢鬆懈，拍呢齣戲之前，我都唔識咩叫緊張，但同梁家輝合作，我就好認真投入咁去拍呢套戲。
論王家衛：好多unknown
後來我拍《花樣年華》同梁朝偉合作，偉仔連試戲都好認真，雖然我拍呢套戲嗰時好多都係unknown，王家衛導演只係話畀我知角色人物性格係點，每日去到現場開工，至會話我知當日要做乜戲。我覺得自己就好似一塊Puzzle，但唔知成幅Puzzle砌緊乜！砌出嚟係咩畫面？每日好似即興演出咁，都係一個好難忘嘅經驗，因為對磨練同提升演技真係好有幫助。呢套戲最後正式上嗰陣，我同張耀揚雖然只係得把聲，但我都覺得冇所謂，最緊要學到嘢，而且特別版VCD都有收錄番，都OK啦。
口述：孫佳君
筆錄：影視組
攝影：吳文聰
場地：Il Caffe
化妝：Natalie Soo（D-mop beauty by ND & Co.）