栢芝全裸劇照 離奇「流」出

在新片《危險關係》中栢芝與張東健有不少大膽情慾鏡頭，昨日網上流傳兩張疑似是栢芝的全裸劇照，網友對其中一張女子背面全裸照極為敏感，並推斷相中人正是栢芝本人。雖然裸女身形與纖瘦的栢芝略有出入，而在另一張見此女子面貌的相片所見，輪廓與栢芝並不同，但網友則以栢芝一張半躺床上輕抬玉腿的劇照作藍本，言之鑿鑿的指裸女為栢芝本人。但據曾觀看電影的人士表示，該片中栢芝並無全裸戲份，至於是否已刪掉則不得而知。而本報聯絡栢芝經理人，但至截稿前未有回覆。

接受訪問訴心聲

另方面，栢芝早前接受內地傳媒訪問，訪問中她直言不時過着晚上偷泣、翌日裝開心的苦日子，栢芝說：「雖然我嘅人生觀係『全世界都唔可以打低你，只有你自己至可以打低自己』，但我好多時係過住『用晚上嘅飲泣嚟換第朝歡笑』嘅日子，好多人或者覺得我條路好難行，但我覺得仲OK。（你仲相唔相信愛情？）信！好信！從冇放棄過相信愛情，我信真愛係上天安排，但都要用啲時間去等，我唔會諗愛情係咪永遠存在，信得就唔使問會唔會長久，問得就係唔信啦。」

畀兩個小男人管

栢芝雖揚言有子萬事足，但又稱需要有大男人來好好管束自己，她說：「表面睇我好似好強，其實我係個女人仔，好需要一個大男人嚟管住我，我鍾意我嘅男人同我講，你唔可以咁、唔可以咁，鍾意佢問住我去咗邊？同邊個去？因為佢緊張你至會問住你，我好享受呢種感覺！依家我就喺兩個小男人之間忙到頭暈，Quintus會成日嗌住：『媽咪，你要抱我！』Lucas就成日要我陪佢睇卡通，我試過同Quintus剪完頭髮，Lucas會即刻問：『媽咪你放工返嚟，同我剪個同細佬一樣嘅頭髮。』係o架，我係有子萬事足，我真係諗唔到仲有咩男人可以介入到我同兩個仔之間嘅生活。」文：影視組