鍾舒漫泳兒破冰變知己

S：鍾舒漫 V：泳兒

慢熱型 熟落多嘢講

V：我哋喺2、3年前傳過不和，係由一本雜誌寫先，唔止寫我同你，仲拖埋（容）祖兒落水，嗰期好興一齣劇集叫《宮心計》，就話我哋公司啲歌手好似劇中人咁樣，勾心鬥角，我仲記得源頭係由借鞋事件引發。

S：09年，我問祖兒借鞋出席頒獎禮時，只係一件咁簡單，但啲人就發大嚟講，話祖兒借鞋畀我就係幫我，公司變咗好似分黨分派咁。

V：我好記得喺頒獎禮慶功宴度，影到張我哋冇傾偈嘅相，跟住話我哋面左左、唔妥大家，慶功宴成個幾兩個鐘頭，冇可能不停咁傾偈，啲報道寫得我好衰囉，令我覺得好難受。

S：我都知你唔開心，畀着我都會啦，無啦啦畀本雜誌係咁攻你、攻你，我同你都係慢熱嘅人，唔會同唔熟嘅人「嗶喱巴喇」咁講嘢。

V：嗰時我都有諗過係咪自己問題，我真係有反省過，我只係唔想講嘢啫，可能咁就畀人覺得我寸同好大牌。

S：不過我嗰時怕愈講愈錯，唔敢問你：「係咪唔妥我呀？」直至阿Sa（蔡卓妍）同William（陳偉霆）搞birthday party，就係嗰次成為我哋嘅轉捩點，我哋由頭黐到落尾不停咁傾偈。

V：你同我講話聽過某某話我同公司講唔好畀你出碟，我哋雖然冇唔妥，但都會有疑問，會諗呢排係咪有嘢發生咗呢？大家一齊喺新秀時，關係都好close。

S：係呀，我係冠軍，你係亞軍，其實我哋聽到呢個傳聞時，第一個反應係：黐線，但有人講，個心都會窒一窒，都會好想知係咪真嘅呢？之後大家都講清楚，都覺得係冇可能嘅事。

V：好stupid囉，明唔明呀？好stupid。我發誓我冇講過囉。

S：好有有理說不清嘅感覺，有時覺得咁多是非，都係出面啲人搞風搞雨搞出嚟。

Sherman和泳兒在生日Ｐ內終於打開心結，感情由此大提升。	泳兒與Sherman曾被拍得一同挑選內衣。	泳兒曾現身撐推出新碟的Sherman。

「友」飯局 開心顯廚藝

V：嗰晚，我覺得唔可以用破冰嚟形容，不過大家感情真係跨進咗一大步。

S：嗰晚可以咁open去講呢件事，可能同我飲咗少少酒有關係。

V：我都有，真係要多謝阿Sa同William請我哋去飲嘢。講真，之前我真係有懷疑過你係咪唔鍾意我。

S：正常都會咁諗啦，聽完之後要選擇信定唔信，嗰期加埋啲雜誌又加鹽加醋，人都爆啦。但同你熟咗，就覺得你係傻同黐線o架，你個人其實好簡單。

V：諗起嗰晚講清楚件事，真係好開心囉。

S：我記得有一晚，我仲同你傾偈傾通宵。

V：我哋friend咗之後，我、你同Ken（洪卓立）都經常約出嚟食飯，多數會去你屋企，由你親自下廚，你手勢真係好得，不過見你喺廚房騰嚟騰去都戥你辛苦。

S：我唔辛苦，見到你哋食得咁開心，我都好開心，仲覺得自己好威添。

放大圖片

放大圖片

搏殺期 寧取消放假

V：我依家最想同你、阿Ken同其他同事去旅行，本來我諗住8月中去旅行，但最終都去唔成。

S：大家實在太忙。

V：初時諗住請幾日假，但因為我哋啲工作係互頂咁做，如果全部走晒咪冇人做就唔得囉，不過我哋一齊出trip做嘢時，放咗工就可以一齊去玩同食，或者去啲近近哋嘅地方玩幾日，我好想去浸溫泉呀。

S：我都想呀，喺香港做嘢實在太攰。

V：Sherman，你有冇試過因為公司突然加你工作而要取消假期呀？

S：有一年，我試過同公司請咗假，諗住同屋企人去旅行，點知臨出發前，公司打畀我話有個job要接，叫我有心理準備，嗰一刻心情即刻down晒，好在個job啱啱喺我假期最尾嗰日，所以只要我縮短個假期就OK，我都可以放到假，陪屋企人玩幾日咋。

V：我就冇你咁好彩，嗰次我一年前同公司請假，諗住同屋企人去旅行，點知公司突然又話我要接一個新job，嗰個job咁啱就喺正我假期嘅中間，我已經同公司講咗唔接得唔得，但公司話唔做唔得，所以我最後都放唔成假，我不知幾咁傷心。

S：唉，冇法啦，我都知做藝人唔同其他行業咁，可以放紅色假期，其實正面啲諗，有嘢做好過冇嘢做，如果做藝人可以成日放長假，我諗佢嘅星途都唔會太好，除非佢好紅，已經係天后級，我哋呢啲仲喺搏殺期，梗係要努力啲啦。

V：我都知嘅，我都明白公司要我哋做，一定有原因，出發點一定係為我哋好嘅。

文：音樂組　

攝：沈健程

服裝：Peppermint

化妝：Cyrus Lee@Beauty Tech

髮型：Keith Wong@orient4.com.hk

場地：紅磡都會海逸酒店