張天愛第4度離婚 繼續尋愛

名媛張天愛(Flora)與影星王盛德(Russell,暱稱羅素)結束九年婚姻,分居一年多,現正辦離婚手續。張天愛第四度婚姻失敗,令人愕然,四結四離是圈中少有,一向事業心重的張天愛,與羅素因文化背景差異,又相隔兩地,最後決定和平分手,張天愛揚言永不言敗,繼續追求真愛,愛情是她生命中第一。

芭蕾舞蹈家、時裝設計師張天愛結婚四次,2003年下嫁相識多年的羅素,結婚後長居美國,一度將事業也遷移彼邦,近年她看到中國巿場潛力無限,在北京發展藝術學校,繼而移居北京,羅素亦曾共同進退,可是最終無法適應中國文化而返美國。自此兩夫妻分居美國和北京,文化思想鴻溝漸深,令這段婚姻難以得到共識。

相處唔好無謂呃

Flora在電話中承認與羅素已分開的事實,她說:「我哋已分居一年多,還是處於分居期,未正式簽紙離婚,冇出現第三者,亦冇錢銀上的瓜葛,係和平下分開。」Flora表示與羅素文化差異很大:「佢係非常美國化嘅中國人,而我雖然係鬼妹仔性格,但其實熱愛中國文化,兩人背景已好唔同,加上我有好多諗頭,樣樣嘢都想做,而羅素覺得佢係一個演員,只想專心做好演員,我想佢向多啲方面發展,但得唔到共識,變咗大家價值觀唔同。而且我哋兩個發展地唔同,大家都唔想由零開始,佢喺美國發展得咁好,我冇理由要佢放棄,但我亦有我自己嘅夢想。」

Flora認為選擇此時公布乃適當時機,她說:「我覺得冇乜事需要隱瞞,有必要向外交代,因為如果唔講,某日羅素交朋友、或同個女仔出街食飯,寫成佢哋出軌,或我同男性朋友出街,又亂寫,咁會對我哋唔公平。況且我唔覺得離婚係唔好嘅事,我係21世紀女性,有自己獨立嘅思想、事業,唔使靠老公,兩個人相處,如果冇得再行落去,就瀟灑離婚,我哋坦誠面對,好過有啲夫妻明明唔夾,都仲要呃住對方,喺香港好多呢啲人。」

Flora透露最傷心的日子已過,現忙於打理北京的藝術學校。Flora與羅素雖然已分開,但兩人關係非常友好,還不時有短訊聯絡,至於兩人有否復合機會?Flora說:「一定冇可能,我哋生活方式太唔同,佢要好多嘅空間,而我要將自己嘅時間排得密麻麻,我哋見到大家都會頭痛,但我好欣賞佢嘅才華。」縱使感情路經歷四結四離,Flora依然堅持追尋心中所愛,她說:「我叫天愛,當然相信愛,愛情永遠排第一位,但依家唔係追求呢樣嘢,呢方面太容易得到,現最能滿足我的是發展藝術學校。」

至於Flora女兒邢嘉倩昨晚出席陳斯允婚禮,被問到媽咪離婚一事,她火速入場,不發一言。而Flora又接受了查小欣的訪問,將於今晚在她的節目中播出。

馬詩慧不知離婚

記者致電Flora前妯娌的王敏德太太馬詩慧(Janet),她表示他們甚少來往,不知兩人離婚。印象中大伯羅素為人文靜,甚少說話,不像王敏德愛講笑。問到是否二人性格不合?她說:「兩個人分開一定有好多問題,佢哋一來好少返香港,二來大家都忙好少聚頭,佢哋兩個識咗好耐先結婚,兩個人男才女貌,不過有啲嘢唔可以睇外表,合則來不合則去。(張天愛太過女強人引致分手?)佢哋兩個好sweet,喺羅素面前嘅張天愛變成一個小女人。」

張天愛 Profile

今年51歲的張天愛(Flora)為市政局前主席張有興女兒,才華洋溢,於英國皇家芭蕾舞學院畢業,八十年代曾參演《再生人》及《追女仔》等電影,並創立自家時裝品牌,邁向國際打造時裝事業。同時又活躍社交界,參與不少慈善事務。並獲「世界傑出華人獎」及「十大傑出青年」殊榮。

羅素 Profile

今年49歲、原名為王盛德(Russell Girard Wong),紐約出生,與弟弟王敏德同為影星。受母親感染自幼學舞,並精通中國功夫及跆拳道,八十年代曾在美國歌手David Bowie(大衞寶兒)及Janet Jackson(珍納積遜)的MV中演出。1985年來港和梅艷芳合演電影《歌舞昇平》,憑《大班》打入荷里活,及演《盜墓迷城3》等電影。

文:名人組

第一手消息請下載on.cc東方互動iPhone/iPad/Android Apps