吳千語嫌林峯年紀大

吳千語與林峯拍攝電影而傳出緋聞,年僅十八歲的吳千語坦言希望另一半年紀不要相差太遠,問到與三十二歲的林峯有否發展機會,她說冇諗過有冇機會,亦笑言拍攝中感到林峯的「chok風」,若現實中過分chok會有點奇怪。

影壇新人吳千語與毛舜筠在新片《男人如衣服》中飾演一對母女,毛舜筠極力反對女兒與年紀比較大的鄭中基拍拖。問到吳千語現實中能否接受年長的男友如林峯(三十二歲)一樣,她說:「佢大我好多,只大幾年會好啲,唔好相差太遠,否則興趣方面可能不同,如果夾硬遷就唔開心啦。(發展機會?)冇諗過有冇機會,只係出去食飯嘅朋友。(佢好chok?)有場戲感覺到佢股chok風喺隔籬。現實中不需要chok,生活中都chok會好奇怪。」

鄭中基想追多個

戲中鄭中基與吳千語飾演一對,問他在片場中有否受到林峯的壓力,鄭中基說:「冇。(老婆施壓?)做嘢冇所謂。(緋聞絕緣?)不嬲都冇,結婚後都冇興趣寫我啦,我一向都好定性,返屋企有老婆同女左擁右抱,已經好開心。(追多個?)想,積極行動中。」

毛舜筠讚峯好仔

另外,毛舜筠坦言自己的女兒與吳千語年紀差不多,故演得分外投入。問到會否准許女兒拍拖,她說:「佢得十七歲,如果真係拍拖自己都要有心理準備。(要過目?)到佢結婚都唔知要見幾多個,唔好吓吓驚動老人家。」

問到毛姐片場有否感到林峯與吳千語有「火花」,她笑說:「林峯真係同我個女咩?收得好埋喎咁。係咪阿峯單方面追我個女咋?阿峯都係一個大好青年嚟嘅,又鍾意食嘢,係好就鍾意食㗎嘞,好有胃口。」

文:影視組

服裝:Acetex、 Bauhaus、Pull & Bear