湯寶如靠唱歌搵外快 男友財產冇得分

十二月湯記將在紅館舉行首個個人演唱會，之前主辦商數度為她向紅館入紙申請，但每次都落空，突然十二月有人空出檔期，她說︰「我打定輸數唔得，但又批喎，雖然有一定壓力，但依家興懷舊嘛。」有意全面復出樂壇的她希望再創高峰，她會以蘇永康做藍本為自己找個定位，她說︰「有獎咪畀我攞，我唔係要攞最受歡迎女歌星，撞啱一首好歌仲可以走埠登台。」她透露有唱片公司向她招手，但她不想被合約綁死，會慎重考慮。

囝囝唔知身份

而跟賽車手男友Sam未婚產子，兒子今年已經五歲大，湯記表示囝囝不知自己是歌手，因為她不想兒子知道她是公眾人物，但她的演唱會一定會畀囝囝去睇，她說：「佢始終有日會知。」至於男友對她個唱也不聞不問，她笑說：「佢到依家都冇問我一句，有時我會用手機畀啲演唱會海報相佢睇，佢回覆一個滴汗公仔，咩意思呀。」

湯寶如坦言跟男友財政獨立。

久休復出的湯寶如最近曾以學生造型任演唱會嘉賓。

湯記坦言跟男友財政獨立，她笑說︰「男友講到明你唔使旨意我啲樓寫你個名，我寫畀我個仔，我話是但囉，我啲樓都唔係寫畀佢，保險受益人都係寫我個仔。」湯記覺得做女人要靠自己，她坦言不能睇男人面色，她笑說；「我好怕大男人o架，畀面色我睇就一巴冚落去。」

拒被婚書束縛

跟男友拍拖多年，湯記坦言結婚與否不重要，她說：「結婚那又如何呢？睇得多身邊朋友，有啲同居八年、十年，一結婚唔夠半年就離婚，係壓力問題，張紙都係一張束縛。」

採訪：音樂組　

攝影：吳文聰

場地：彌敦酒店