趙世曾攬洋妞 進軍國際

趙世曾近日備受外界關注，原因他女兒趙式芝早前高調向外公布與鐘錶太子女楊如芯四月在法國結婚，為趙世曾所不滿，豪言會出五億為女兒招婿，事件迅即成為國際新聞頭條，不少外國傳媒均爭相要求採訪趙生，美國abc電視台節目《20/20》早前來港，為趙生拍攝一輯富豪生活特輯，並將於本周五播出。前晚攝製隊跟隨趙生去睇首映，趙生親駕一輛開篷勞斯萊斯到場，後座有兩名穿超短裙的外籍洋妞，架勢十足，見記者緊張地採訪，他說：「大家慢慢，唔使咁心急，我有十五分鐘呀！」企定定左擁右抱風騷至極，現場亦一度導致塞車，他說女伴是由女兒安排，問到為何不帶現任女友Lena出席？他只說：「佢中國有啲事。」

畀唔同嘅路女兒揀

對於荷里活有意拍他的五億招婿故事，趙生說：「佢哋冇人聯絡我，反而電視台想喺電影開拍前影咗我先，之前佢哋去屋企同遊艇，坐直升機做訪問。（有傳電影改咗為The Lesbian，嬲唔嬲？）唔會嬲，芝芝係佢選擇，我會畀唔同路佢揀，（用五億拗直女兒？）我覺得我個女好直。（式芝喺fb話為何不能接受女人有另一半女人？）係佢自己內部嘅想法，佢鍾意點做係佢嘅事，我畀多條路佢行，希望登報搵到個Mr Prince Charm（魅力王子），等多啲人嚟追求佢，如果佢唔接受男的追求，係佢嘅決定。」

冇福分做Sean外父

對於式芝的另一半Sean，他坦言不會跟對方做朋友，問到對方當他是外父？他說：「我冇咁嘅福分。」指若女兒真正註冊，事前一定要跟他商量。他說自己一世不結婚，故不會逼女兒結婚，豪言：「我老竇冇攞五億出嚟，都有好多女仔追求我。」

他說現已有兩萬個應徵者，雖然趙生強調應徵者都希望跟式芝做朋友，但當中有人投資失利要求資金周轉。他希望女兒有所依靠，如果女婿冇錢，會給錢對方投資做生意及買樓。他說每個人都有自由去接受或不接受，但又否認自己為女兒選婿是自相矛盾。

文：名人組