糖妹跪地拜師學做戲
組合糖兄妹成員黃山怡（糖妹）最近密謀「撈過界」踩入影視圈，日前接受本報獨家追訪她向舞台劇經驗豐富的湯駿業（阿Dee）拜師，她揚言要向師傅取經學做戲。糖妹雖曾為無綫拍劇《戀愛季節》，惟她大呻處女劇中沒有感情線：「我只可以睇住人戀愛，可能我個樣未夠班做女主角。」糖妹為隆重其事，拜師當日屈膝跪地斟茶學藝，更送上自備的拜師禮物，她說：「我準備咗啲『糖』同埋『梅』畀師傅，即係將我成個人送畀佢，等佢每次食『糖梅』時都諗起我！」
自認女版王祖藍
而阿Dee接過禮物後，亦有封內藏個人新碟的「大利是」回禮，並稱是首次單對單收徒弟：「我收學生嘅條件係一定要對自己工作有要求，我覺得糖妹有可愛嘅外表，野獸嘅內心，好捱得苦！」他又更即場扮糖妹廣告中的鬼馬樣：「我有留意佢啲廣告，佢好識控制面部肌肉，好適合拍戲。」而糖妹笑言：「好多街坊都笑我係女版王祖藍，可能我哋都係咁搞笑！」
文：音樂組
攝：林蔚恩