黎明講樂基兒：過去式就係過去式
天王黎明（Leon）上周三越洋發布離婚聲明後，昨日首度開腔回應「分訊」，被傳受情傷的他，未見斯人獨憔悴，對傳媒任影任問，但選擇性作答，期間還拋出「過去式」金句指情已逝，但提及有關樂基兒（Gaile）傳有第三者及分身家等敏感問題時，Leon一律封嘴！
Leon昨午5時15分乘搭蘇黎世航班自歐洲抵港，架上黑超，一身便裝，未見戴有婚戒，在助手子泉陪同下步出機場閘口，獲數十歌迷及兩名工作人員接機。有備而來的Leon甫見現場逾百傳媒，擺出chok樣、雙手插袋企定定拍照，傳媒把握時機上前拍照及發問，場面一度混亂，被逼得寸步難移的Leon，要在兩名助手左右開路，邊行邊接受傳媒為時約20分鐘的發問。
記 = 記者 黎 = 黎明
記：Leon，今日係咪有嘢講？
黎：冇冇冇，冇嘢講。
記：你心情點？可以唔可以講幾句？
黎：我冇嘢要講……（對於傳媒不斷提問，他突然企定，鄭重說）你又叫我講幾句，到底你講先定我講先呀？感情嘅事，過去式就係過去式，一個過去式嚟講，永遠都屬於兩個人嘅事，過去咗，冇嘢可以再講。
記：你有冇聯絡Gaile呀？
黎：……（沒有作答）
記：依家係咪辦理緊離婚手續？
黎：我哋所有嘢都交代晒，喺媒介裏面，做藝人最麻煩就係愈講愈多，愈講愈亂，搞到件事沒完沒了，根本冇必要再講，但係兩個人作為藝人，又唔可以唔同傳媒講，唯一可以交代嘅都回應晒，多謝各位。
貼心叮囑勿跌倒
Leon說畢便起步離開，全程被傳媒360度重重包圍，在扶手電梯往地下時，見傳媒被逼到面容扭曲，也貼心地叮囑大家小心勿跌倒。再被追問「傳Gaile有第三者喎？」、「係咪分一半身家畀Gaile？」及「Gaile再見亦是朋友？」等問題，Leon仍不發一言。
記：可唔可以講一句呀？
黎（語氣帶點寸）：我講得一句，就有第二句、第三句、第四句，變得沒完沒了。
記：心情點呀？
黎：我OK。
記：但有講你喺北京療情傷喎？
黎：（擰轉背回答身後的記者，語氣仍有點寸）我喺歐洲返嚟，冇去過北京。
抵達停車場時，已坐在七人車等候的經理人陳善之打開車門迎接，上車後的Leon隔住玻璃不時向車外的傳媒揮手道別，座駕全速駛回跟Gaile的上水昔日愛巢。而身在外地的Gaile本報記者WhatsApp她對黎明受訪一事表示：「不回應。」剛巧伍詠薇夫婦及馬德鐘夫婦同在機場現身，伍姑娘出席名模好友周汶錡法國婚禮後返港，她得悉黎樂離婚後大嘆可惜，因覺二人很相襯。
文：音樂組
攝：追蹤組