泳兒詩雅打狗主意
泳兒（Vincy）與詩雅（Michelle）無論外表、品性及發展路向都各走極端，本是道不同不相為謀，但兩女走在一起時，一凹一凸出奇啱key，在Michelle眼中，冷酷的Vincy可愛又夠專業，而Vincy就覺得Michelle是她的開心果，大家有說不盡的話題，她們更不排除將來夾份開狗店。看來兩個好姊妹嫌做同事、朋友都未夠，仲要做埋搵錢拍檔。
一歌一影互相欣賞
詩：我哋第一次正式見面應該係拍電台劇，故事係講三個女仔，雖然我哋同場，但就冇對手戲，嗰次我對你印象好深刻，因為你有個朋友帶咗麵包嚟探你班，點知你一見到袋麵包就好開心，笑得好燦爛，好似成世人都冇見過麵包咁，嗰刻我覺得你係一個好易滿足嘅女仔。
泳：哦！我記得嘞，嗰個朋友係我舊同事，佢嫁咗去廣州做少奶奶。嗰次拍劇真係好可惜，你拍完先到我拍。我覺得自己演技真係唔得囉，完全冇呢方面嘅天分，所以我都冇諗過進軍電影圈，不過我依家做戲應該會好過以前，我唱歌揸住支咪就得啫，叫我做戲做表情喎，好尷尬嘅，感覺都唔係自己。
唱到嘔 非歌星料
詩：如果叫我唱歌，我咪又係唔得，好驚囉。講你知呀，我之前同洪卓立錄電影主題曲，我真係一啲都唔enjoy囉，錄音嗰段時間好漫長，好似過咗幾年咁辛苦，除咗覺得好頭暈外，我仲驚到嘔添，只係錄咗一陣，我就頂唔順要暫停，因為我要衝去廁所嘔，唔知係咪聽到自己唱得好難聽有關呢，可能唱歌唔係我最鍾意嗰樣嘢，之後我都唔再勉強人哋要聽我唱歌。
泳：我對你唱歌唔係咁深刻，應該唔會太難聽囉，否則我一定會記得。我明白你點解咁驚唱歌，正如我做戲唔叻，要逼自己做時，真係幾痛苦o架，我以前因為要做戲，返屋企專登對住塊鏡練表情，仲練咗好耐，點知練熟咗，第二日對住鏡頭，我竟然乜都唔記得晒。
詩：不過如果有機會唱電影主題曲，我都OK嘅，藝人要多方面發展先好玩，但出碟唱咁多歌就唔好啦。我有次同你及洪卓立（Ken）一齊澳門做騷，我同Ken喺後台，聽到有人唱歌，嘩！真係唱得好好聽，聽番啲工作人員，原來係你喺台上試咪，點知隔籬個工作人員同我講：「泳兒，仲未開聲喎。」嗰一刻，我覺得自己算罷啦，我都係專心發展電影比較好。
設計首飾年底開業
詩：我覺得我哋嘅共同話題就係狗，我自己養咗幾隻狗仔，你又好鍾意哥基犬。
泳：我前幾年係有打算開寵物美容，我好鍾意動物，有朋友話同我夾錢一齊開舖頭，當時我有諗住掟十幾萬出嚟投資，搞間走高檔路線嘅pet shop，但因為有一個風險，最後我冇做。
詩：我都有諗過開狗店，只做美容、食品，但所謂唔熟唔做，我覺得做珠寶比較適合我，因為我未入行前，做開珠寶生意，幫啲朋友搵靚鑽石，最近我畫緊草圖，打算年底前就開檔推出自己設計嘅珠寶，不過我推出嘅珠寶首飾數量唔會太多，都係每一款都得一、兩件，我諗住頭炮嘅首飾系列以動物為主題。
泳：係咪會設計哥基首飾呀？
詩：哎吔，今次冇哥基，既然你咁鍾意，不如我設計一款哥基首飾送畀你啦，我下次起咗個版畀你睇吓先，睇你鍾唔鍾意先啦。
齊齊試穴位減肥
泳：就係因為我哋工作上好難合作，所以我哋好珍惜見面嘅機會，一見到面就乜都會傾，你記唔記得我哋試過一齊去減肥呀？
詩：係呀，係呀，我仲問「你咁瘦都唔知減邊忽」？我嗰時就真係要減肥。
泳：我記得你介紹我試一種類似針灸嘅減肥法，嗰次我問你做乜突然減咗咁多，你就好興奮咁同我話，係用穴位減肥法，嗰期我要谷首跳舞歌，要着露腰衫，所以身上唔可以有任何肥肉。
詩：我減肥後，依家都keep到100磅，你呢？
泳：好耐冇上磅啦，我記得最瘦時，即係plug嗰首快歌時，只得88磅，嗰次真係跳舞都跳到瘦，但上鏡就啱啱好，我又唔覺得得88磅唔健康喎，嗰次我練到有腹肌，但依家乜都冇晒啦。
詩：其實我好欣賞你嘅專業精神，你做每一件事都好上心同認真，記得有次同你做完event後，大家一齊上車，當人人都喺度傾偈同hea嘅時候，你就好忙咁打電話畀整頭、執衫嘅同事，其實呢啲小事，可以畀公司同事搞，你唔使咁辛苦親自去處理。
泳：咁做嘢先有推動力去令自己做得更好嘛，況且我唔想麻煩其他人，我依家都學習緊放鬆自己，不過呢啲係我性格上嘅問題，好難改。
文：音樂組
攝：沈健程
服裝：Magenta
化妝：Cyrus Lee@Beauty Tech
髮型：Keith Wong@orient4.com.hk
場地：紅磡都會海逸酒店