胡定欣當街扯高衫 闊少艷腹無邊
現年31歲的無綫姐仔胡定欣，箍唔掂電視城筍盤馬國明後，踏入中女之列的她為覓好歸宿，火速溝掂創作界有米新歡沈栢淳（Patt），打得火熱的兩人，日前買定外賣上男方家過夜，為冧新歡定欣更不惜當街揭高上衣，施肚皮誘惑。
胡定欣入行九年，感情生活一直多姿多采，除了獲其承認的吳浩康和馬國明兩段情外，更不時和合作對手傳緋聞，有指定欣和馬國明拍拖一年多後分手，一直對這個被公認為電視界筍盤的舊愛念念不忘，多番出招想箍煲翻撻，爭取兩人一同出埠及低調客串男友主演的電視劇，但最終都未能令馬國明回心轉意。
炮製浪漫生日P
定欣痛定思痛後，踏入中女之齡決鎖定目標，不願再煲「無米粥」，終於在今年初於朋友介紹下認識創作界筍盤新歡Patt，由電視界入創作界，加上新歡家底豐厚又有才華，拍拖不久定欣已視對方為結婚對象，今次拍拖不容有失。
據知，家境不俗的Patt由外國留學回港，自設創作公司，於廣告界甚有名氣，作為老闆的他身兼美術指導、攝影師及創作顧問，最重要的是Patt對定欣一見傾心，拍拖半年多不停施冧招氹女友，間中會發放銀彈及浪漫攻勢，送花又送手袋，逗得定欣心花怒放，不時於微博晒幸福，更經常帶同Patt出席好友聚會，認定對方的男友地位。早前定欣31歲生日，Patt花盡心思為女友搞了個驚喜船河派對，靜靜雞幫女友約定一班好姊妹，包括胡杏兒、黃智雯、胡蓓蔚等，令女友在船上過了一個既浪漫又熱鬧的難忘生日。
開籠雀狂冧男友
愛得癡纏的定欣和Patt，日前又再秘密約會，當晚九時多穿上闊領露肩上衣、大騷誘人鎖骨的定欣，駕駛其座駕和男友於灣仔買了兩大袋外賣隨即上車，然後直駛往中環一停車場。泊好車後，手持外賣的Patt和定欣一同下車，兩人有講有笑步出停車場，繼而站在路邊等的士，有男友在身邊的定欣如同開籠雀般，不停甜絲絲地逗男友說話，Patt亦一臉冧笑望住女友。
等了數分鐘仍未有車，定欣一度嘟晒嘴又托頸，狀甚不耐煩，不過，眼見Patt同樣無癮，定欣又變臉改為逗男友開心，先是搔首弄姿一輪，忽然又當街揭高上衣，懶理姐仔身份，露出一大截白滑肚皮，Patt眼睜睜望實女友施誘惑，其後兩人截到車，火速趕去男方家開餐兼溫馨直落。
有新歡甜到漏的胡定欣，昨日接受電話訪問時坦承正和Patt蜜運中：「我哋近呢幾個月開始拍拖，新男友係朋友介紹，大家性格好夾所以走埋一齊，加上佢職業係做廣告，算係半個圈中人，會好明日我哋嘅工作。（冧功了得？）佢上個月陪我過第一個船河生日Party，好開心，有份出席嘅胡杏兒都好戥我開心！（畀男友幾分？）暫時唔畀分，我哋仲發展中！」
闊少起底
胡定欣的新歡沈栢淳（Patt）來頭不小，只有三十餘歲的他，已有自家廣告公司「Hivemind」並擔任創作總監，曾為王菀之擔任MV導演，以及為張敬軒拍攝影集。向來出手闊綽及家境不俗的Patt，不時送名牌手袋給女友。
文、攝：追蹤組