陳雅倫100%「搏」愛
藝人陳雅倫（Ellen）不但性感，而且還很感性，畢竟是個曾經和前度拍拖長達11年的女子。人生有幾多個十年？戀愛壽命更短，但Ellen說愛過就不後悔，要麼不愛，要愛，就愛得義無反顧！
陳雅倫（Ellen）能夠在娛樂圈馳騁逾廿年，有甚麼甜酸苦辣沒嘗過？但說到感情事，內心還是少不免有條刺，她說：「我呢生人拍拖最長時間11年，係邊個唔使講（音樂人黃尚偉），我係個一拍拖就會百分百投入嘅人，試過入行初期，冇同公司交代就去咗拍拖，但基本上我係個分得開工作同戀愛嘅人。」
拍拖覓終身伴侶
Ellen表示自己對每段感情也很認真，可說是十分長情，每次戀愛也會當另一半是終身伴侶，她亦大方透露：「拍咗11年嗰位都係，（對方都當你終身伴侶？）佢都有提過『不如結婚』，只不過當年家人反對，最終搞到分手，家人阻力影響好大。（有冇後悔若將時間擺喺工作，成就更大？）冇得咁比，我細個唔成熟、任性，但如果真係有得再揀，我會事業行先。」
努力為事業打拚
正所謂「沒有經過長夜痛哭的人，不了解愛情真諦」，少少甜、多多澀過後，失戀的人就會成熟，現時的Ellen努力為事業打拚，她說：「我返咗內地工作咁耐，最近好想多啲同香港觀眾見面，拍番多啲嘢，我唔要求一定要靚嘅角色，劇本有說服力，我做阿媽、阿嫲都得！（唔心急搵男友？）我都好想有人錫，但都唔到我心急，（你咁性感應該好煞食？）好多男士就係因為我嘅外表唔敢埋身，其實我唔難追，只要個男士真心、疼錫我就得！」
文：陳奕龍
攝：黎志輝