趙式芝fb反擊 暗寸風流父

早前趙式芝坦承跟同性密友Sean在法國結婚，大膽的出櫃宣言獲得不少好友祝福，惟雙親卻未能接受，尤其父親趙世曾更立即發聲明給傳媒，澄清愛女沒有結婚，還開出五億來為女兒招親，就連外國傳媒亦廣泛報道。昨日Gigi又在facebook（fb）上留言，以英語反諷說：「為何中國人社會接受與歌頌一個男人娶五個老婆，卻會批評一個選擇不嫁丈夫的女人？可笑……」她又指討厭那種「大人喺度唔輪到細路仔講嘢」的態度，認為這是一個不出櫃的共產主義；更以性意味字眼去表達對男權主義的不滿。

諷男女不平等

記者昨日致電Gigi，她否認暗寸父親，並笑說：「係人都知我老竇冇老婆o架啦！（但佢有好多女友，形象風流？）女友同老婆係兩樣嘢！我冇寸任何男人，我只係寸呢個社會嘅男女不平等現象！」早前曾指公布婚訊後有壓力，要祈禱來求平靜？Gigi聞言續說：「祈禱求平靜成日都會，依家應該為啲海難死難者祈禱，希望佢哋安息，我呢啲超級無聊嘅新聞，就無謂嘥精神去報道。」

而趙世曾昨日回覆記者電話時仍語帶輕鬆，他說：「女大女世界，我盡咗父親責任，幫佢計劃最好嘅將來，（佢話你喎？）冇話我，我一個老婆都冇，肯定唔係講我。」

趙式和撐堂妹

另外，Gigi堂姊趙式和（Jane）昨日出席「都市.像素」王益輝個人作品展時，坦言有留意Gigi的新聞：「我有同Gigi通過兩次電話，佢覺得同Sean一齊都一段時間，其實好多人知，只係之前未正式公開。（對Gigi「結婚」有何看法？）呢個年代唔會好抗拒，又唔係害人！呢個係佢兩個私生活，最緊要佢哋開心，我都戥佢哋開心。」Jane又謂兩個人相愛不應理會對方性別，而是對方的人品。

文：名人組