郭富城梁家輝再爭獎拖手拍住上
梁家輝與郭富城多年前曾於港、台的電影頒獎禮相遇爭影帝。事隔多年，兩雄在新片中再遇，大有機會再在頒獎禮上聚頭，家輝揚言「雙飛」攞獎最公平，二人更希望能拖手上台。曾覺得城城跳進影壇是「打醬油」的家輝，留意到城城在影壇的努力，城城也大讚家輝是「天生的演員」，惺惺相惜！
梁家輝與郭富城曾於杜琪峯電影《柔道龍虎榜》合作，兩人分別於2005年的台灣金馬獎、2006年的香港金像獎對戰，結果，城城贏了金馬影帝，家輝則在香港金像獎封帝，總算平分秋色！
談到認識之初，早過郭富城加入影壇的梁家輝不諱言當初看到城城由樂壇跳入影壇，感覺很不順眼，家輝謂：「佢加入影壇嘅時候，已經係舞台王者嚟，我當時覺得佢點解要叉隻腳埋嚟，唔好嚟影圈『打醬油』（意即：唔關事），做好自己個瓣咪好囉，但後來我發現佢喺選角方面好多元化，有啲仲係非常高難度，一啲另類嘅電影佢都會接，我慢慢明白佢係真心想做個好演員，想喺電影方面做出成績，一個咁有理想同出色嘅演員，我點可以唔默默支持同鼓勵佢呢！」
激發爆炸力
相反，城城對家輝的感覺，則由始至今沒有改變，城城謂：「如果大家搵番多年前嘅訪問，會發現我好多年前已經話家輝係我好喜歡嘅演員，我覺得佢天生就係一個演員，有一種魅力，當電影公司同我講今次拍《寒戰》嘅對手係佢，我真係開心到不得了，同佢合作可以激發到好大嘅爆炸力。」
除了爆炸力，梁家輝還笑言兩人有一種發自內心的默契，大家不用多言，已經會不約而同把一個好劇本做到最好，亦不會搶戲、爭戲，是令人安心的好拍檔。
博合作機會
兩雄如此惺惺相惜，衍生了一個好問題，曾經在電影頒獎禮對敵的他們，若果憑新片再度相逢，應誰勝誰負？梁家輝答得最中肯：「若果真係咁，站在公平嘅角度，我會覺得我自己攞唔好，佢攞嘅話亦都唔好，最好係一齊攞，仲要拖住手上去攞，咁樣可以增加我哋之後合作嘅機會，因為啲導演可能會對我哋存有幻想，想再用我哋，等我哋可以喺另一部片入面分勝負。」而城城亦有此意。
文：影視組