鮑比達逼葉麗儀棄舊嘗新

歌曲《上海灘》中「浪奔！浪流！」這一句唱到街知巷聞，每每播出，大家就會想起歌手葉麗儀，憑其雄厚的唱功縱橫樂壇超過32年。事隔多年，今年葉麗儀與鮑比達合作推出英文大碟，將多首耳熟能詳的經典金曲重新演繹。Chris為了力求完美，由揀歌、編歌、製作都一手包辦，親自挑選十首歌給Frances唱。

Frances表示今次放棄以往的澎湃的唱法，希望樂迷可以發掘到另一個葉麗儀：「舊年12月嗰陣大家坐下商量之後，我3月就問佢拎歌，因為我要做定功課去演繹啲歌，咁我4月收到之後，就用電話錄咗畀佢聽，點知佢話唔係咁唱，佢要我放棄我以前嘅唱法。結果今次係用一個輕鬆嘅唱法，我都好驚訝今次Chris發掘到另一個我！」

Frances希望現今歌手會找到自己的風格。

Chris自言非常嚴格，揀歌、編歌、製作都一手包辦，令Frances十分放心。

現今歌手兼顧多

作為樂壇前輩級人馬的Frances坦言現今樂壇與上一代樂壇有所不同，現今做歌手要兼顧的東西有很多：「以前我哋做歌手只要你把聲靚，個樣五官端正就可以做歌手，我哋嗰陣唔係兼顧咁多嘢，壓力無咁大。（有無睇好邊個？）我睇好王菀之同王梓軒，兩個都識得創作，不過其實我覺得搵到自己嘅風格係好緊要！」

採訪：專案組

攝影：沈健程

場地：泰亭