田蕊妮窮奢極侈：瞓醒就食魚翅

之前去接受電台節目訪問，題目係《貧賤夫妻百事哀》，我唔介意傾呢個題目。係咪「百事哀」，係睇你點睇。做人可以好playful，唔使咁認真。如果你份人「百事哀」，無論你成功或失敗都會「百事哀」。

以前我哋兩公婆都有試過「百事哀」，就係有錢嗰時，嘩！使來使去，使極都係面嗰浸，點使都使唔晒咁！但係如果冇經歷低潮，一定仲以為自己好勁好叻，真係迷失得好緊要！當問番自己究竟想要咩時，就會諗，其實係咪無端端飛去英國使百幾萬，就係等於快樂？

每月出糧畀老公

當年阿澤拍完《無間道》加上又做電台，收入真係唔錯，加上我同佢喺亞視捱咗咁多年，出街有人叫我哋，真係會好有名成利就感覺。最誇張一次，係我瞓醒問：「老公，今日食咩好？」阿澤一句話去食翅，嗰餐早餐就係魚翅。總之想食乜買乜，諗到就去做。阿澤一向好照顧我，想我過最好嘅生活，所以當時拍戲之外，就去打牌、濕平或買股票，每日嘅快樂，就係來自贏麻雀或股票賺幾多。後來，發覺咁嘅生活好唔實在，雖然依家嘅生活冇以前咁奢華，但係反而好舒服。呢幾年阿澤所有收入都存入我哋公司戶口，每個月由我出糧畀佢，每次萬五蚊。呢個數係佢要求，話怕自己有錢身痕，話可以學吓點善用金錢，覺得好好玩！

我哋兩公婆依家最大嘅財富，唔係話銀行有幾多錢，而係大家有共同信仰，目標一致，健康開心咁生活，係千金難買嘅快樂。（完）

口述：田蕊妮　

筆錄：專案組　

攝影：劉智源

服裝：Zadig & Voltaire　

場地：L'hotel Island South