苟芸慧趁亂一剝突襲香香
昨日「新一代女神」岑麗香（香香）及苟芸慧一同為時裝品牌行騷，再度同場較量。苟姑娘趁影大合照混亂時，不經意脫下外套，露出一身低胸裙子，輕易搶鏡，而全程穿上皮草的香香惟有以「熱」力抗衡苟姑娘。
憑無綫劇《巴不得媽媽》彈出的岑麗香，昨日與苟姑娘一同為時裝品牌TED BAKER2012秋冬系列擔任嘉賓模特兒，同台還有李亞男及朱慧敏。
四人換上多套服飾示人，不過在影大合照時，苟姑娘突然脫下外套，令在旁穿上皮草的香香措手不及，旋即被搶鏡。記者取笑香香不除皮草外套給比下去？她說：「但我係唯一一個着外套嘛！（覺得自己唔夠性感？）我唔覺得自己性感，就算着比堅尼都係為劇情，我私底下好casual，鍾意着T恤牛仔褲，好似鄰家女孩咁，我覺得咁樣仲性感啦！」
互讚女神
問到香香可認為「勁敵」苟姑娘性感？她大方說：「佢係我女神，佢早我一屆（華姐），我成日同佢講，佢好似仙女咁，如果畀我都會投佢一票。」
至於苟姑娘受訪時就否認刻意脫外套搶鏡，她說：「大會之前係叫我哋要除外套，不過後來可能因為有啲混亂，所以大家都冇除，不過唔緊要啦，靚就OK。」對於香香讚她美若仙女？苟姑娘即時「回敬」說：「佢都係，佢Sweet。（介唔介意外間將你哋比較？）唔介意，有比較先有進步，我自己平常心做好本分！」對於網友指香香比苟姑娘優勝，苟姑娘續說：「咁大部分人都覺得佢好過我，佢應該係好過我，我要學習佢嘅優點。」
文：名人組