周秀娜益男友 歎雞唔使錢
性感女神周秀娜吸金力勁人，即使封胸拍攝廣告仍進帳七位數字，近日成為快餐店雞包代言人的她獲一世免費食雞，她笑言以後同男友陳偉成拍拖外出都只會食雞，認真識做！
近年頻頻返內地搵人仔的周秀娜雖然甚少逗留在港，但她在香港市場依然有價有市，吸金力勁人。近日，快餐店KFC便睇中周秀娜擔任其中一款雞包代言人，即使封胸拍廣告，仍然進帳七位數字，相常和味。
最近忙於在內地為新片開工的周秀娜，早前特地抽空返港拍攝該廣告，當日她以特工造型上陣，擺出多個戰鬥格甫士。雖然今次性感欠奉，但周秀娜仍自封「火辣特工」，她笑說︰「今日我係一個賣包嘅火辣特工。（點解封胸拍攝？）Sexy就留番畀件雞啦！我唔Sexy佢哋Juicy就夠。」
八層高啱做搶包山
拍攝當日，周秀娜不用埋位時就包不離手，她直言想起現在可以終身免費食雞及包就感到非常興奮，她說︰「當然感謝客戶，最開心可以一世免費食雞同包，以後同男友拍拖淨係去食雞，可以有幾多食幾多！」她又笑言代言的包有八層高，又推介長洲搶包山可改用這款包，她笑說︰「個包咁高，我建議用呢款包去搶包山，夠晒特別，如果有機會用到呢款包，我一定報名去參加搶包山！」
對於今次酬勞有七位數字，她直言相當滿意，問會否將酬勞入市買樓？她擰頭說︰「應該唔會喇，自己都冇時間睇樓。」甚具生意頭腦的她反而想投資生意，她說︰「之前做內衣生意成績唔錯，依家諗住再投資生意，但要諗吓搞乜好，最緊要當然係搵到錢啦！」
文︰專案組