黃偉文嘆斷背路難行：愛好偉大
別怕，愛本是無罪！趙式芝和楊如芯（Sean）勇敢地承認她們的同志身份，並衝破世俗眼光，於今年四月結婚。圈中不少曾出櫃的藝人，莊思敏及趙碩之都為這對「敢愛夫妻」送上祝福，而黃偉文（Wyman）則表示無論男男或者女女，所付出的都比男女更加多，證明愛係好偉大。
名人趙世曾女兒趙式芝與鐘錶業太子女楊如芯前晚手拖手出席公開活動，並大方承認經過七年相戀，已於四月在家人和好友的見證下，在法國成婚。雖然父親趙世曾在接受記者查詢時堅稱：「冇咁嘅事，你哋搞錯啦。」但一眾圈中好友都紛紛向這對勇敢為愛站出來的一對送上祝福。
曾考慮上電視剖白
作為趙式芝好友、曾公開承認與五個Tomboy戀愛的莊思敏，昨日出席活動時透露，一早已知道兩人的婚訊：「我一早知佢哋嘅婚事，其實早兩個月前已經想請佢上嚟我個電視節目，由於節目內容要講感情事，佢當時心情有啲十五、十六，話唔知應唔應該公開。」最終兩人都決定大方承認，莊思敏大讚她們勇敢之餘亦不忙送上祝福：「佢哋兩個感情好穩定，相處得好好，衷心恭喜佢哋。」
黃偉文雖坦言跟兩人並不稔熟，但亦大方祝福她們：「所有愛都係美好，無論係男男或者女女，佢哋嘅付出需要比一般男女更加多，同時都證明愛係好偉大。」Wyman又稱繼黃耀明和陳志全（慢必）先後「出櫃」，現時又有趙式芝，證明社會是開明，能夠接受各人的不同，雖然遲了起步，但追得好快！他又自言將來結婚機會很微。
趙碩之籲自由戀愛
另外，與莊思敏同樣曾公開與同性拍拖的趙碩之，對趙式芝結婚感到高興，且衷心祝福她們幸福快樂，她說：「無論名人定普羅大眾，唔同性取向嘅人都擁有同樣嘅人權，大家可以自由戀愛，同埋互相尊重。」
文：音樂組