聶凌花足一年 斟掂映期
潮流興講「成功爭取」，沒想到連港產獨立電影《赤裸人性》，在康城、西雅圖、多倫多等外國電影節參展過、揚威過後，也要花足一年時間與院商周旋，才能成功爭取在港上映，監製聶凌率同片三位導演大爆箇中辛酸。
《赤裸人性》由三齣短片《神召男》、《無性界之婚》、《Cry 2》組成，題材大膽，其中《無性界之婚》由「變性警」Kitty粉墨登場，年初在多倫多華人電影節勇奪「最佳短片」及「最佳男主角」殊榮，載譽歸來，卻直至本周才成功爭取有院商肯放映，監製聶凌回顧一年來的多番斡旋，她說：「試咗足足一年，又搞業界人士放映會，但只有口碑，始終冇戲院肯上，可能我哋題材講變性人、殺人、強姦好敏感，甚至有工作人員話收過電話，話唔想見到我哋套戲上映，真係試到我都萬念俱灰，連投資者都話唔再等上戲院之際，忽然收到影藝肯上嘅消息，令我覺得好鼓舞。（有冇查吓係咩人唔想你哋上畫？）我諗係個別團體怕套戲會造成社會不安，例如勾起曾被強姦嘅受害者嘅傷痛之類，但我希望反對嘅人睇咗我哋套戲，至再落結論。」
搵變性人上陣
《無性界之婚》導演曾憲寧則說：「我哋三條片的確係偏鋒題材，但我同另一位導演嚴嘉兒揀變性人題材、搵現實中真正嘅變性人嚟拍，係想更多人了解變性人，而佢亦達到我哋預期效果，好多謝佢為呢套戲嘅付出。（Kitty點睇自己作品可以喺戲院放映？）我哋好耐冇聯絡，我亦唔清楚佢近況。」
文：影視組
攝：司徒國榮