惠英紅施魔爪 嚇窒男員工

影后惠英紅在新片《結婚那件事》與藝人江若琳（Elanne）、馬來西亞歌手陳慶祥（阿牛）結緣，自名「撻火紅」的紅姐，自爆在片場經常向男工作人員伸出「魔爪」，導演鄭建國亦是「受害者」。

只係想放肆下

紅姐對此笑謂：「因為拍戲時間好長，又熱又多蚊，有時見到啲人跌watt，我就會走埋去彈佢哋嘅乳頭，等佢哋醒神啲。成個廠嘅男人都畀我搞過，我唔係刻意非禮，只係想放肆下，有時太認真咁搞笑反而唔好玩，無乜界線同善良嘅搞笑會開心同醒神啲。」

紅姐大讚Elanne（左）做戲有天分和有實力。

鄭建國透露自己亦是受害者，又大爆紅姐愛猜枚提神。

由於四處「辣火頭」，紅姐笑言曾有工作人員意圖反擊，到最後還是被她嚇至收手：「我會話：『嚟呀！我畀你我畀你（彈乳頭）！』嚇到佢哋即刻唔敢郁。」

Elanne有天分

鄭建國又爆料指紅姐愛在片場與阿牛猜枚提神，紅姐則反指導演偶爾會與阿牛打乒乓球自娛，紅姐力讚阿牛是驚喜製造者：「佢會突然彈句嘢出嚟令到全部人笑到肚痛，好鬼馬！我最鍾意笑佢：『扮怕醜、揩你油』哈哈！」

紅姐又力讚Elanne夠坦白及做戲有實力：「佢影齡雖然唔大，但有天分，起碼會令人覺得她唔係做緊戲，呢樣竅門唔係一般演員可以捉到。」

文：影視組