鄭希怡做解剖師百種演法

鄭希怡（Yumiko）於英皇電影《消失的子彈》中，飾演一個外冷內熱的解剖師，Yumiko坦言為演好解剖師一角，下了不少苦功，她說：「導演羅志良要我睇好多資料，要上網睇熟呢一類專業人士係點樣講嘢，又會有啲咩特定動作，然後再要我諗定九十九種演繹方法至好嚟開工，當我預備咗九十九款演法，導演喺現場原來一樣都唔要，要我臨場再發揮，今次真係一個難忘經驗。」

同霆鋒三度合作

Yumiko更點名鳴謝戲中兩位影帝級人馬劉青雲及謝霆鋒，她說：「最難忘戲中青雲同我講我暗戀個男仔嘅死訊，青雲不斷畀戲我，我感覺到佢好希望我哋合力將套戲做好，不斷幫我，呢種無私精神，令我印象好深。同樣係影帝嘅霆鋒，我同佢已經係第三次合作，佢今次都一如以往咁認真，而且愈來愈成熟，係個有分量嘅影帝。」

Yumiko感激劉青雲及謝霆鋒於電影中帶她入戲。

Yumiko演出用心，戲中一段無疾而終、生死相隔的戀情，賺人熱淚。

Yumiko雖已嫁杏有期，但她搞笑地說：「我都唔知呢套戲會唔會係我婚前最後一套戲，因為好多嘢話唔埋，話唔定（男友）最終唔娶我呢！不過今次真係好享受拍攝過程。結婚對我係完全冇影響，只係身份唔同咗，工作都係照做，演員就係要有演員道德。」

文：影視組

攝：鄭家俊

化妝：Andy @ D-mop Beauty by ND&Co.

髮型：Ziggie @ salon la mod

服裝：ABOUTIQUE.