霆鋒生日搞gag 怕栢芝「送鐘」

謝霆鋒、劉青雲及鄭希怡前晚現身會展，出席英皇電影新片《消失的子彈》首映，霆鋒父母謝賢及狄波拉、青雲太太郭靄明、薛凱琪、陳法拉、孫佳君等均到場支持。霆鋒與青雲更別出心裁乘坐人力車進場，配合《消》片中的懷舊時代背景。

不嬲冇心結

霆鋒被問到是否已收到栢芝挑選的生日手錶時，他雖略帶失落，但不忘搞gag說：「隻錶唔係買畀我，好彩佢唔係畀人影到買鐘，『栢芝送霆鋒鐘』就唔係咁好！其實都唔使咩表示，我都唔着重過節日，今年生日喺北京做嘢，冇同對仔慶祝。（同栢芝離婚後輕鬆咗？解開心結？）唔可以咁講，我不嬲都冇心結，總之大家努力做自己嘢，為對仔好，冇必要搞到唔開心。」霆鋒又指因為青雲才接拍此片：「青雲令我學到好多嘢，包括人品，好欣賞佢，不過我哋傾偈唔夠30句。」

栢芝早前被本報拍到疑買禮物給霆鋒。

青雲坐人力車入場，令人印象深刻。

青雲讚醒目

青雲對霆鋒的稱讚謙虛回應：「佢客氣啫，年輕人好醒目。少傾偈係因為我要打醒十六分精神應付導演羅志良。呢套戲唔係偵探片，係講要犧牲好多先可維護正義，總之乜嘢人都啱睇。」青雲又謂數月前已知好友張達明患病，但希望多留時間予對方休息：「都係睇報紙至知佢病情，康復咪好，開開心心。」

文：影視組