曾勵珍：唔覺佢有咩痛苦！
有指無綫導演張永豪涉嫌虐待女演員劉蔚萱，無綫總監（戲劇製作）曾勵珍及監製李艷芳昨日召開記招，指有若干報道斷章取義。曾勵珍謂：「唔知有乜咁大件事！第一，個導演唔係我親戚，而且網上片段只係一部分，斷章取義！我睇晒條片，係導演教佢做戲，唔係虐待。之後佢仲繼續拍戲，唔覺佢有咩痛苦！」李艷芳則稱該演員與導演事前有溝通，本來一場三、四個鏡頭的戲，卻拍了兩小時，故導演示範一次給她看。李艷芳又指劉蔚萱拍攝後有講有笑，更提議為求逼真，拍補戲時將田雞放在膊頭。
無綫喊報警捉賊
曾勵珍補充：「拍咗兩個鐘，係人都心急，人之常情，如果係咁，第日啲導演唔使教人做戲啦！」曾勵珍強調定必找出放片段上網的人，然後交公司處理。據知，懷疑該片段是由無綫「競爭對手」的臥底於攝影房偷影放上網，無綫已洞悉是誰所為，現正緝兇，準備報警。另一監製梁材遠昨日出席活動，他表示曾與張永豪合作，覺得對方是藝術家脾氣，是有心的導演。
