阿佘撐神獸天使 斥導演質素差
「神獸天使」劉蔚萱（Jenny）拍劇期間被指疑遭導演張永豪「施虐」，事件報道後惹來全城熱論。有傳曾遭張永豪爆粗問候的佘詩曼看不過眼，力斥對方質素差！而圈中前輩杜汶澤、蔡少芬及袁彌明亦發聲力撐，不過盛傳Jenny因事件曝光而遭照肺，可謂黑仔冇運行！
Jenny以新人姿態接拍劇集《心路GPS》，日前拍一場遭人膠袋笠頭、撼頭埋牆兼被田雞威嚇的戲份時，因達不到導演張永豪要求，要重拍多次，期間Jenny嚇得嚎哭，故導演被指有施虐之嫌。事件曝光後，Jenny不欲多言，似有所顧忌，將所有委屈吞進肚裏！昨傍晚她與張永豪先後被召回公司「訓話」，各自向高層區偉林及曾勵珍同場，當面解說事發當晚的細節及過程。
蔡少芬：不知所謂
記者昨日與Jenny取得聯絡，她直認心情沉重：「我自己睇到條片都覺得驚訝，本來係想淡化件事，亦都要多謝監製畀機會我，我只係想做好自己，同埋想無綫好。其實尋晚（前晚）我都同導演再開工，佢同我講咗唔好意思，大家已經冇嘢。（你覺得佢咁教戲有冇問題？）我唔知佢教戲，你咁講我咪知囉。」Jenny透露母親患癌8年，最近病情復發，怕身在內地的母親得知報道而擔心。
據知，當年佘詩曼拍劇時，亦曾遭張導爆粗問候。她昨日透過短訊回覆記者，趁機為Jenny打氣。阿佘說：「對於質素咁差嘅人，我唔想作任何回應，不過我覺得個女仔唔應該怕，亦唔可以放棄自己嘅理想，圈中好嘅導演多的是！」now主播蔡誌恩昨日亦於微博上載相關報道，蔡少芬隨即轉發，且留言力撐Jenny：「看了片也令我很驚訝，怎麼會這樣對待人？更別說是個女孩了！就算是新人也應當尊重，這導演的所為，實在不知所謂，令人生厭！」
杜汶澤寸恰新人
身為前輩的杜汶澤同樣無名火起，先在社交網站留言：「呢條友喺亞視做PA已經傻傻哋……如果呢個女仔唔係新人，唔知佢敢唔敢？換轉係搞我老婆（田蕊妮），我會殺人呀！」記者致電阿澤，他承認與張導曾於亞視合作，難忘對方躁狂表現：「佢經常講粗口同發脾氣！好彩佢嗰時仲係PA。或者咁講啦，教戲吖嘛，如果男主角唔識錫女主角，係咪要推開人哋自己去強吻個女仔呢？對待新人要有耐性同方法，如果唔識教咪唔好做導演囉，呢個係你嘅工作，邊個郁手就唔啱。」
「過氣無綫人」袁彌明亦憤然回應：「叫個女仔搵我，我陪佢去報警啦！係咪癲o架？我覺得要炒咗個導演囉！」
文：影視組