胡杏兒：馬明成日話追我
馬國明入行以來的首個緋聞女友，是當年和他一起接受電台訪問而結緣的曾華倩。2005年，馬明被拍得與曾華倩在咖啡室密會，又出入女方香閨，即被傳兩人姊弟戀。傳聞歸傳聞，馬國明至今亦高度讚揚曾華倩是好女仔，更以「非常投契」來形容。曾華倩接受本報訪問，對於馬國明給自己的高度評價照單全收，並簡而精地說：「好多謝馬明咁讚賞我，我都好鍾意睇佢啲戲o架！總之大家努力啦！」
另外，自胡杏兒與黃宗澤分手後，即傳馬明與胡杏兒撻着。雖然緋聞假到唔假，但杏兒受訪時竟爆對方仍在追求她。杏兒笑謂：「馬明到依家都成日話要追我，不過係講笑啫！佢以前好鵪鶉，收收埋埋，行步路都要黐牆，但依家佢係心情開放咗，成日同助手或化妝阿姐口花花講笑。呢個轉變係好，由以前係一隻鵪鶉變成今日好有星味嘅藝人。（佢口花花啱唔啱你？）做朋友OK，但係我真係冇諗過，太唔真實嘞！」