李嘉欣迷人女紫
紫色予人浪漫優雅感覺，今季時裝界就掀起一股紫色風潮，圈中靚女亦湊湊熱鬧，可惜紫色屬高難度Carry色系，可以穿出高貴Classic味道，也易顯得老氣，絕非人人駕馭得到。名模陳嘉容讚大美人李嘉欣高貴非常，美艷動人。
李嘉欣
好靚好高貴，大方得體，又略帶少少性感。對高踭涼鞋同條裙都好襯，金色襯紫色好靚，成個感覺好迷人，將紫色演繹得好好。
劉嘉玲
幾特別，個手袋係亮點，如果佢唔係拎呢個手袋而係拎其他女人手袋就出事，會好老氣，依家加咗呢個手袋即刻型咗，加咗啲分。紫襯紅本身難Carry，佢配搭OK，玩層次感。
Jocelyn
條裙好靚，着得好高貴，漸變嘅紫色平時好少見，真係令人眼前一亮，成個人都好「搶」！
傅嘉莉
好似着住條圍裙出街咁，特別條黑色褲，完全錯晒，如果着肉色絲襪露返條腿，加對高踭鞋會好少少。
汪圓圓
似返工同阿太，普通斯文打扮，欠缺咗Model嗰種風範，無乜驚喜，髮型亦都太老積。
戴妮廷
件衫同leggings紫色撞其他色，原來好sharp，但佢着上身有啲鬆，睇出嚟感覺肥咗，如果佢放番啲頭髮落嚟啲，會感覺新潮啲。
Rosemary
穩陣派嘅cocktail look，one-piece裙加對涼鞋唔會錯得去邊，如果加番多啲Accessories會靚啲。
溫碧霞大勝周冬雨
溫碧霞與周冬雨兩位形象截然不同的靚女分別穿上同款吊帶Cocktail dress，陳嘉容認為溫碧霞的效果更勝一籌：「溫碧霞着出呢條裙嘅味道！佢身形靚，襯個簡單髮型已經好好睇。周冬雨着到衣不稱身，鞋同手袋都襯得唔靚，髮型又好娘，成個look都唔好睇。」
陳嘉容Profile
名模陳嘉容曾為各大國際品牌行時裝騷，在時裝界打滾多年，對時裝方面的認識無論是理論還是實戰都難不到她，近年更為電視時裝節目擔任主持，化身Stylist教人配襯衣着打扮。