筱靖開中門王家敏出口術

一眾亞姐馮雪冰、王家敏、張家瑩、顏子菲、筱靖、周嘉莉、康馨月與藝員徐丁、林睿等前晚到中環為《ATV2012亞洲小姐競選》進行招募。眾亞姐打扮性感示範catwalk，以性感打扮「中門大開」露半球的筱靖台上解開徐丁恤衫鈕，笑謂要鬥「事業線」，其後徐丁抱起周嘉莉在台上擺甫士卻令她露打底褲走光。

應屆亞姐亞軍王家敏行catwalk時似乎不太情願，她受訪時解釋：「因為冇準備，之前食飯太飽驚凸胃腩。」提到她打扮較其他亞姐密實而「輸晒」，她笑言：「係呀，下次等我（着得）勁啲！」王家敏稱有留意亞視被外界圍插的新聞，更為此感不開心，不過她認為新聞不會影響亞姐招募，強調海外招募反應熱烈。

王家敏雖然相較密實，不過上台一刻仍屬焦點之一。	由左至右：顏子菲、馮雪冰、王家敏、張家瑩、筱靖 一眾亞姐以性感打扮為新一屆亞姐進行招募。	馮雪冰谷胸搶鏡。

成熟淡定欲再參選

王家敏被問到事件可會影響她到內地發展？她說：「點會呀，亞視本身咪係共產黨囉。」語出驚人的她嚇窒在場傳媒，問她此話是甚麼意思？她反問：「乜唔係咩？盛品儒、王征喺內地有好多投資、合作，同中國關係好密切，我都喺大陸出席咗好多宴會，公司都話喺大陸發展，好似北京、武漢發展得好快。」

筱靖被問到會不會介紹朋友參選？她反而硬銷自己說：「我反而想再選呀，依家狀態好好，以前參選時肥啲、騰雞啲，依家成熟咗淡定好多。」

採訪：影視組