黃榕搵吳彥祖借種

現時單身的性感女星黃榕直認以往眷戀靚仔，笑言不介意向吳彥祖等型男借種，希望生個靚BB！但因在感情路上屢遇挫折，已經一事長一智，下一任男友必須是信得過的結婚對象。

性感女星黃榕（Gloria）與上任男友分手半年，Dry爆的她只好將工作表排得滿滿，但仍難掩心靈空虛，她直言想盡快再拍拖滋潤一下。不過，Gloria在感情路上屢遇挫折，經常錯遇花心男，她承認以往迷戀靚仔及型男，現在的擇偶條件亦有所改變，最重要是對她專一及愛錫自己，問到是否想找結婚對象？她說：「其實每次拍拖我都會諗結婚，明知未必有結果都會幻想吓，但依家會實際啲，唔會再咁迷戀靚仔，會相處吓覺得對方信得過先開始。」

唔做高齡產婦

她又自認母愛氾濫，笑言看到鄰家的得意小朋友，會逼對方叫她媽媽，更曾考慮問型男借種：「有諗過搵個好似吳彥祖咁嘅型男借種，或者一夜情都冇所謂，咁樣個BB都靚仔啲啦！不過都係講吓，我唔會咁做！」問到會否怕變高齡產婦？她直言想在35歲前結婚生B完成人生使命：「如果係闊太可能好啲，佢哋食多啲補品，我就唔想太遲，亦唔想未婚生仔，所以都驚o架！」