黎耀祥跳出框架 演繹真感情

黎耀祥於《造王者》中飾演余靖一角，角色性格愚忠，只顧及天地良心，不過實在是「好人難做」，一個太過平實、正派的角色，發揮方面始終有所限制，但祥仔坦言此角都有其好玩之處，就是給他一個很好的練習機會。祥仔謂：「呢個角色畀我練習講長對白的機會，有時講大半頁紙，對手只會畀少少反應，點先可以令觀眾睇落去唔悶呢！」

記性好係缺點

祥仔出名記性佳，不過他認為這優點亦是缺點：「有時記憶好反而會冇咗自由發揮空間，以前要求自己記晒對白，要求唔NG，其實當中係好多嘢可以修正，反而新人不斷撞、不斷試，會有新火花，所以有時我都想忘記某啲技巧，想有番真情、直接嘅感覺。」

祥仔表示演戲是無窮無盡，他又謂：「大家話我戲好、記性好，可能呢個係一個框框，戲好即係技巧好，但唔係好事，要適當調節。」祥仔擔綱演出的《大太監》成為今年的台慶劇，對於這個被看重的劇集他坦言對收視有信心，問他有否信心憑此劇再奪「視帝」獎項時，他坦言：「攞獎係要夾天時、地利、人和，觀眾取向都好緊要，都要睇到時觀眾反應，依家問我信心一半一半啦！」

爆老婆係小三

此外，祥仔昨日接受電台訪問，大方提到與前妻及經理人兼現任太太Julia的感情事，直認Julia是第三者：「雖然佢係第三者，但感情世界入面冇乜對錯。（你一生人只出現過兩段感情？）其實中間係出現過一啲零碎。」祥仔大讚Julia是個單純、勇敢的女子：「我依家有嘅嘢都係同太太一齊奮鬥、努力攞番嚟。」

文：影視組

攝：司徒國榮

化妝：Din Tse

髮型：Ivan Lee@Headquarter