秋官戲上心頭：阿姐問我點喊!

其實做臨記都要有關係，但我唔止想做臨記嘛……後來我去咗兩間訓練學校報讀，都冇乜下文，最後參加「同文影業公司」嘅訓練班，佢哋比較有規模、有誠意啲！

投入角色 自信演繹

喺嗰度我首次接觸到良鳴同鍾景輝（King Sir），學到好多嘢，接觸到俄羅斯戲劇大師「史坦尼斯拉夫斯基」嘅心理體系演技，係由內至外、用心理完全吸收潛意式，然後發揮出嚟，早前無綫劇《心戰》我都有用呢種方式去演。有一套理論我哋成日講，係刺激、刺激就成為潛意識！用咁嚟帶動演戲，好似好深奧，其實係代入角色，演起上嚟就會好有信心，面對觀眾或機器都唔會慌失失！

阿姐與秋官這對老拍檔，在《血》劇中再次合作。

King Sir（左）是秋官其中一位指導名師。

曾經接觸過一位內地演員，佢係「示範級演員」，見佢拍一場感動戲，佢叫攝影師、燈光師都唔好望佢，話望住入唔到戲喎……咁就代表佢冇內在支持囉！汪明荃曾經都問過我點樣演喊戲，2002年我哋合作無綫劇《血薦軒轅》，有場戲係講佢個囡囡要死，佢要喊，仲問我點喊？其實我冇乜拿手招數，只係盡量入戲，當年跟良鳴學戲，教識我做戲要有方向！唔敢講阿姐請教我，只係大家研究吓啫！

後記：

熱愛演戲的秋官，當年身負重任拍打仗劇《楚留香》捱出肝病快要死，不獲放假睇醫生，並被無綫高層冷言對待：「你死好過我死！」，因為不肯放棄演藝事業，未被打倒，反而爭氣捱出頭，成為演藝界「長青樹」。秋官的打不死精神正好給時下年青一代藝人最佳借鏡。

文：影視組

攝影：劉志源

服裝：BOSS Black

場地：Bella Vita