鄭少秋：再唔睇醫生會死
鄭少秋於1979年拍下成名作《楚留香》，不少華人地方都將《楚》主題曲作為喪葬送別的輓歌，寓意「一路好走」。成名背後秋官亦賠上健康，當時他七日七夜冇得瞓為趕劇而捱出肝病，迫於無奈向公司請假睇醫生，秋官向一位無綫高層說：「再唔睇醫生會死…」但對方只說：「你死好過我死！」
多年來在無綫拍咗好多劇，其中《楚留香》係最辛苦一套。同一時期，我又要畀期拍電影《名劍》，所以電影、電視兩邊搶人。《名劍》捉我過去開工，落閘唔放人，後來我拍番《楚》劇，但就好辛苦，七日七夜完全冇瞓。試過有日我攰到當個燈光師轉燈就瞌着。後來醒番，拍嘅時候只見眼前刀光劍影，冇乜意識，跟住先識驚。
高層唔體諒
拍《楚》劇時，開始覺得自己好攰，以為唔夠瞓，實情係個肝開始有事，我年少時試過有黃疸病，所以體質唔係太好，之後仲死頂拍劇，後來頂唔住去驗小便先知有肝病，我咪同公司要求放我假去睇醫生囉，點知公司話：「出街冇得停喎！」我仲向一位高層講：「會死人喎……我個人開始黃！」點知有人話：「你死好過我死！」
呢位高層係邊個就唔好講，但我唔會為一句說話而流眼淚，鬼叫我鍾意呢行咩！最後都捱咗個劇，完埋個電影就停晒工入院住咗一個月，好番後連行路都冇力，真係元氣大傷！
試過打Botox
我嗰時只係三十幾歲，後來我咪靠自己養生調理身體，健康係恢復咗，但過量吸收營養，食到個人好肥，塊面好多暗瘡！依家就食得好清，最近我仲飲果醋，有條方係咁嘅：將蘋果醋浸黑豆浸24日，聞說話補腎，我每餐都食十幾粒，醋就點肉食，維持到依家。早年我覺得面頰太瘦，仲試過打Botox，但效果唔太好，有針窿，我冇再試，不過最近肥番啲，塊面飽滿番，唔知係咪運動有幫助，提升咗好嘅膽固醇，上鏡好睇啲嘛！
口述：鄭少秋 筆錄：影視組
攝：劉志源
服裝：BOSS Black
場地：Bella Vita