Fiona升呢一姐 力谷「事業」

金牌經理人黃柏高（Paco）昨日以董事總經理身份出席公司「太陽文化一周年發布會」，吸引城中名人、導演、傳媒界高層撐場，而旗下藝人紛紛上台獻唱及大談感受，Paco亦透露公司未來計劃，先為新加盟的歌手小肥舉行紅館個唱，接住又為杜汶澤搞Talk騷及與台灣魔術師劉謙舉辦內地巡演。

日前本報率先披露薛凱琪（Fiona）以600萬跟Paco簽約，她昨日果然以壓軸嘉賓現身，並與Paco進行簽約儀式。以白色窄身Tube Dress示人的Fiona成功谷出2吋半深「事業線」，卻不時用手遮胸，受訪時亦主動拿傳媒的咪牌遮住。記者恭喜她做一姐，但Fiona謙虛說：「唔好咁講，我係妹妹嚟。」問到是否600萬簽2年？Fiona以商業秘密作回應。問到如何谷出「湯碗胸」？Fiona笑說：「有用『缽仔糕』，見係新開始。（你真係好有事業心？）唔識答。」

Fiona正式跟Paco簽約，雙手一握即開拓全新事業發展。

Sita直認羨慕小肥將在紅館開騷，希望自己有這一天。

由於其緋聞男友方大同亦快約滿華納，問到有否拉攏對方過檔？Fiona說：「冇，佢非常有自己思想，唔會受任何人影響。」Paco亦大讚Fiona的造型令人眼前一亮：「配合未來『事業』發展。」又大方透露與Fiona簽約3年，首要為對方揀好導演及劇本。

陳僖儀喜見師姐

同場的台灣魔術師劉謙否認與李蘊分手：「一直有聯絡，大家是好朋友。（你哋有拗撬？）吵不起來了，大家語言不通。」又稱在李蘊今年的生日送上祝福及小東西，但不是戒指。至於歌手陳僖儀（Sita）被問到會否擔心Fiona加盟後會被冷落？Sita說：「唔會呀，見咁多有經驗嘅歌手加盟都好開心。（唔驚資源分薄？）公司係大集團，相信資源足夠。」Sita希望有機會與Fiona在音樂上合作，她說：「希望可以擦出新火花。」

採訪：音樂組